Helmi Smeulders Caribbean Chef resientemente a partisipá na un programa di kushinamentu na Barranquilla Colombia i presentando produktonan karibense.  Helmi a yega Kòrsou 23 aña pasa. Na prinsipio el a traha komo hurista pa 5 aña. Su estudio tabata lei promé di drenta kushina. Su pashon no tabata lei pero su pashon tabata kushina. El a kuminsá u kompania di catering pa sigur 16 aña. Den prinsipio Helmi a kushiná kuminda Oropeo te ora el a sera konosí ku produktonan lokal. El a ripará ku e por hasi hopi ku produkto lokal i asina tiki tiki i awor kushina di Caribe ta su spesialidat. E ta kushinando ku produktonan karibense so. Helmi no ta hasi catering mas pero si ta organisá diferente evento ku tur rondó di e kushina karibense.

E diferensia lokal i oropeo

Helmi a duna nos un idea di e diferensia entre produkto oropeo i produktonan lokal. Helmi a bisa ku e tabata na Ulanda na yüli último i el a kushiná den un restorant einan i el a hasié ku apel, diferente berdura i einan a ripará e diferensia pasobra na Kòrsou e ta kushiná ku Mango, papaya, koko. I papiando di e kushina karibense i e komo Caribbean Chef, Helmi a bisa di  a kuminsá usa ingredientenan lokal, pero rondó tin muchu mas, tin hopi ta krese rondó di nos i el a pensa ku e por hasi muchu mas ku e ingredientenan ku tin ku loke ta usando te ainda. Tin e kushina konosí di kuminda stoba etc. ku ta dushi pero por hasi hopi mas ku ingredientenan. I esei ta loke el a bai konsentrá riba dje.

Tin hopi pa usa aki mes

Helmi a bisa ku nos ta biba riba un isla ku ta importá hopi kos pero aki mes tin hopi kos. Ta djis mester wak rondó di nos por ehèmpel tin yen pal’i di tamarein i ora bai supermerkado bo ta haña tamarein di Tailandia. El a mustra e flornan di Bellisima ku tambe por kome. Hopi shef ta importá nan produktonan di Ulanda miéntras ku aki mes tin hopi kos. E ta kere ku mester usa nos kosnan muchu mas. Helmi a bisa ku e tambe ta kumpra na supermerkado pero e ta subi kaya i ta buska Tamarein i flornan. E ta piki shimaruku, kenepa i mayoria bia ta bai sera e kunukero pa kumpra produkto lokal. Helmi mes ta yag riba Lionfish tambe. Ta un piská masha dushi ku ta solamente mester kita e spiñanan venenoso. Ta djis mester sa kon ta limpi’é.

Por hasi hopi ku e produkto lokal

Helmi ta duna tayernan di kushina. E tin e Caribbean Cooking Class voral pa turistanan ku ta siña di nos kushina i nos produktonan. E ta splika hopi di por ehèmpel Lionfish pero tambe kon ta limpia un mango di un manera masha fásil. I despues e ta kushina ku e partisipantenan i ta kaba ku un komementu di loke nan a kushina den e tayer. E tayer ta pa hende lokal tambe, Helmi gusta ora e haña hende lokal den su tayernan pa asina e mustra por ehèmpel kuantu kos por hasi ku yambo ku no ta solamente e sòpi. Por grel e yambo ku tiki salu i zeta i kome. E mesun yambo ei por kome den pika òf den zur i por kome den pan por ehèmpel.

Tayer di kushina

Durante di e tayernan e ta duna instrukshonnan kon pa usa e produktonan. Tambe e tin dos buki di su resetanan ku e ke kompartí ku mundu i meskos e tin un revista kaminda e ta kompartí su eksperensianan. Resientemente e tabata invitado den Sabor Barranquilla ku ta un evento kulinario di 4 dia. Tabatin diferente shef di ekstranhero i einan el a duna un presentashon. El a representá Kòrsou i a mustra kosnan di Kòrsou. El a presentá e funchi hasá, pika, Lionfish trahá komo tartar. Tambe el a mustra riba e banana di ref ku ta un mata ku por haña kantu di laman i ta masha dushi. E ta salu i Helmi ta traha hopi kuné den su kumindanan. Na diferente parti di Kòrsou tin e mata aki. Asta den supermerkado nan ta bendé pero for di Ulanda, siendo ku Kòrsou mes tin e.

Eksperimentá

I pa hasi e kumindanan aki konosí e tin e bukinan di reseta, e ta duna tayer i ta organisá e senanan sekreto. I asta e ta pensa pa kuminsá ku un shou di kushina pa nos hendenan por konosé mas di nos produktonan i siña nan kon pa kome e produktonan di Kòrsou mes. Helmi mes ta inventá su resetanan. Por ehèmpel na Ulanda el a huma papaya i a traha un skuma kuné. Asta e ta traha e ta purba te ora e logra e reseta dushi. Den su kushina e ta eksperimentá ku produktonan lokal. Helmi ta biaha hopi den Karibe pa e mira kiko ta hasi na e otro islanan. Riba e islanan tin kasi mesun produkto pero kada un su kushina tin nan propio spesialidat. Tamarein por ehèmpel nos ta bebe e stropi di dje den awa di tamarein siendo ku por traha sousnan fantástiko kuné segun Helmi. E ta kòrda ku den Karibe el a siña kon ta hasi mas ku tamarein. E ta masha dushi riba spareribs òf galiña.

Inspirashon

Helmi Smeulders su inspirashon pa kushina tabata Jimmy Oliver i Helmi a lesa hopi di su bukinan i ta kushiná un tiki segun Oliver su estilo. Donna Hay ta di Oustralia i tambe a skibi hopi. Donna ta usa produktonan asiátiko mas tantu. Asina Helmi ta  forma su mes estilo.

Hasi mas ku produkto lokal i atraé e turista

Tirando un bista riba nos restorantnan lokal, Helmi ta haña ku hopi a mehora. Hopi a bin aserka kompará ku ántes. Promé tur hende tabata manera meskos pero awor tin yen restorant nobo ku hopi kreatividat i nivel haltu. Ounke ainda e ta haña ku e restorantnan lokal ta kushina masha poko ku ingredientenan lokal na nivel haltu. E turista ta bin aki i ke purba e produkto lokal i nos por promové mas riba e tereno aki. Tin hopi turista ta biaha pa purba kumindanan di otro paisnan i p’esei por hasi mas aki pa e ta mas atraktivo.

Sena sekreto

Helmi ta organisá ku regularidat e dinnernan sekreto. Esakinan ta tuma lugá na lugánan ku e partisipante/kliente no por imaginá su mes. E ta kòrda un ku el a organisá na Fuik den un edifisio ingles i el a mira e edifisio aki for di laman un dia. El a atraé i konosiendo Mijnmaatschappij el a logra organisá. Tambe e ta kòrda un misa pará bashí ku el a pasa vorbei i kier a organisá un sena sekreto einan. I esei tambe el a logra. I den e kaso ei tabata un misa masha fis paden, yen palomba i el a hasi hopi pa limpi’é kompleto i organisá e sena einan. Ku esaki e ta proba di no solamente ta laga e hendenan konosé produktonan lokal mas di aserka pero tambe konosé lugánan ku nos no por imaginá nos mes, transformá nan den un komedor kaminda a pone komementu.

Dinner in the field

Helmi un bia pa luna ta bai serka un kunukero kaminda e ta organisá un kushinamentu einan tambe i siña hende kon ta kushiná ku produktonan disponibel di e plantashon ei so. Asina ta krea un menú. Tur luna e ta algu diferente pasobra Helmi ta kushiná ku produktonan diferente.

Dos buki reseta

Helmi tin dos buki di reseta kaba. I e ta sigur ku por haña mas buki di reseta serka dje. Awor aki e ta drùk ku su revista tambe ku ta kasi mesun tantu trabou ku e buki. E ta kere ku pronto, denter di algun aña e tin otro buki di reseta mas riba merkado.

Kushina karibense riba mapa

Helmi ke sigui ku e kushina karibense. E ta kere ku por hasi hopi kos kuné i tin di pone e kushina karibense riba mapa. Tin kushina di Perú, hapones i hopi mas i esun di Karibe tambe mester subi mapa. I tin hopi pa hasi. Helmi gusta skibi reseta i e ta saka su mes potrètnan di loke e ta produsí. E ta pensa aki algun aña e por traha i produsí pa revistanan internashonal. Tambe e ke biaha komo shef di Karibe i duna demostrashonnan manera el a hasi na Colombia. Ta hopi e tin pendiente pa e hasi ainda. Te ainda Helmi tin masha hopi reseta ku e mes a krea. Den un di e bukinan di reseta e tin 80 i den su revistanan e tin entre 40 pa 50 reseta.