ORANJESTAD.-Polis di Aruba ta informa di un kaso basta fèrfelu ku a tuma lugá den oranan di mardugá tras di lomba. Mas o ménos 1:28 sentral di polis a haña notifikashon di un kaso di tiramentu na Mandolinstraat. E promé informe ta indiká ku un tiru lo a alkansá un Hóben di 17 aña. Sentral di polis a manda un patruya polisial mesora na e sitio i tambe ambulans.
Na yegada di e patruya a topa ku un Hóben herida. E informashon na e sitio ta bisa ku probablemente un KIA Rio kolo shinishi lo mester a para dilanti e kas na Mandolinstraat i lo a los un tiru. E tiru a alkansá e Hóben ku tabata pafó di e kas na su kurpa.
Ambulans a presentá na e sitio i personal di ambulans a duna asistensia médiko na e víktima i despues a transportá esaki ku urgensia maksimo pa hospital. E Hóben su situashon ta kritiko pero stabil.
Unidatnan di polis riba kaya a kuminsá ku e búskeda pa ku e outo enkuestion.
Departamento di recherche a presentá na e sitio huntu polis tékniko pa asina hasi nan investigashon.
Kuerpo Polisial di Aruba ta pidi pa esun ku por a wak algu òf sa algu pa nan yama e tiplijn di polis tel; 11141. Bo anonimidat ta keda garantisa.
