Hóbennan di ántes Feffik a yega sentro Israel Leito
WILLEMSTAD.- Hóbennan a akudí na gran kantidat na e Sentro pa Desaroyo Integral Dr. Israel Leito na Barbadosweg den Buena Vista. Ta trata di hóbennan ku mester a bai Feffik pero manera ta konosí Feffik no ta eksistí mas. Tin pendiente lantamentu di un otro instituto kombiná ku repartishon di e estudionan ku Feffik tabata brinda, bou di otro skolnan na Korsou.
Den wikènt tras di lomba un bia mas por a skucha preokupashon ekspresá di tantu mayornan, presidente di sindikato di dosentenan di skol i otronan pa motibu ku nos ta yegando fin di sèptèmber i ainda e hóbennan no tin klaridat. A bisa ku e siman aki e skol na Brievengat (edifisio Feffik) lo a habri komo Nilda Pinto dependance, pero esei no ta kla kon e mester bai funshoná, konsiderando ku mester kaba di atendé ku empleadonan di eks Feffik.
E preokupashon ta serio pasobra ta bon konosí ku ta hustamente un grupo di hóben speshal tabata na Feffik pues mester atendé di tal forma ku e hóbennan aki no ta stòp di bai skol.
