Hogeschool Rotterdam (Kòrsou) ta prepará e studiante for di aki

Irene Kastaneer Laurensia

Hogeschool Rotterdam tin un ofisina na Kòrsou tambe. Irene Kastaneer Laurensia ta kordinadó i ta duna sosten na hóbennan ku ta bai studia na Hogeschool Rotterdam. E ofisina aki na Kòrsou ta keda na Saliña Galleries, nèt riba restorant Fussions. E ofisina aki na Kòrsou tin basta aña kaba hasiendo e trabou aki, pero tòg ainda tin hopi hende no ta na altura di tur loke nan ta ofresé aki mes. E loke e ofisina ta hasi na Kòrsou ta un oportunidat di oro pa prepará e hóben ku ta bai sigui studia na Hulanda/Hogeschool Rotterdam. E programa ta Subi Jet pa Bo get.

Pruebanan na Kòrsou mes

Irene a splika ku no ta solamente na Kòrsou nan ta ofresé e oportunidat di prepará e hóben pero nan sosten ta pa hóbennan den Karibe. Segun el a konta Djasabra nan ta eksistí mas ku 20 aña kaba i Irene ta aki mas ku 10 aña. E trabounan ku nan ta hasi ta duna sosten na hóbennan i mayornan ku tin yu ta bai Hogeschool Rotterdam. Ta duna anochinan di informashon, pruebanan ku ántes e hóben tin di bai Hulanda pa hasi esaki, awor e por hasié na Kòrsou mes pa basta aña kaba. E gastu ku tin di hasi pa e yu bai Hulanda i traha  e prueba aki mes. Tambe tin e trayekto di 21+ ku ta pa hóbennan ku no tin e diploma pa Hogeschool pero por hasi e prueba na Kòrsou. Tambe tin e prueba di defisiensia ku ta kaminda por ehèmpel e hóben ta laga kisas wiskunde kai i e estudio ku  ke bai sigui ta rekerí wiskunde, tambe por hasi e prueba na Kòrsou  mes. Tambe tin e WDK Toets ku ta esun ku ta konsentrá riba arte i e trayekto di preparashon ku ta Subi Jet pa bo Get. Esei ta un trayekto kaminda  e hóben ta keda prepará i tambe nan mayornan.

Informashon a kuminsá

Ya kaba nan a kuminsá duna informashon na hóbennan i nan mayornan di tur loke Hoge School Rotterdam Kòrsou  ta ofresé. I tambe kiko e preparashon ta eksihí i konserní. I den luna di febrüari pa mart ta kuminsá ku e trayekto di preparashon. Kontenido di esaki segun Irene ta lo siguiente;

-Ta para ketu kiko ta bai studia den eksterior pasobra hopi bia aki na Kòrsou nos ta kuida nos yunan di tal manera, siendo ku na Hulanda nan mester ta mas independiente. Na Hulanda e hóben studiante mes mester kushiná, e mester traha su presupuesto i esei ta sosodé den e preparashon.

-Ta hasi spèlnan pa laga e  hóben sintié ku ta na Hulanda e ta, por ehèmpel el a siña pa un prueba pero ta haña un ‘onvoldoende’ i tòg a siña asina bon, kon ta bai papia ku e dosente pa wak kiko a bai bon i kiko ménos bon.

-Kon pa dil ku dilema; algu a pasa na Kòrsou i komo hóben bo no tin sèn, kiko bo ta bai hasi, bo ta bai fia sèn. Awor aki tin e posibilidat di video call pa sinta papia ku mayornan ki ora si i ki ora no tin di bin Kòrsou den un kaso asina. Ta konsehá e hóben pa den su promé aña na Hulanda e no bin Kòrsou  ku fakansi, den temporada di fin di aña, pero keda einan.

Ta ofresé asta kamber

I na final di e preparashon asta ta duna posibilidat di kamber pa e hóben ku no por keda kla ku esaki. Irene a bisa k nan ta intervení i ta duna su koleganan na Hulanda nòmber di e hóben ku ta bayendo Hulanda pa mira te kon leu por yuda nan pa kamber pa sikiera un aña. Hopi bia no ta bai asina fásil e rekisitonan pa ora yega Hulanda manera buska kamber, tin di inskribí etc., etc. i komo einan Hogeschool Rotterdam tin e departamento ei ku konosé e eksigensianan pa un studiante, ta yuda i ofresé na e studiante i su mayornan.

Servisio pa region

Manera Irene a menshoná kaba, e servisio ku ta duna aki no ta solamente pa Kòrsou pero pa region. Ku region el a referí na Aruba ku tin e mesun trayekto ku nan i e pruebanan komo nan ta sentralisá ta keda hasi serka nan aki na Kòrsou. I e ta mas barata ku si tin di bai Hulanda. E estudionan den kuido mester traha un Decentrale Selectie i nan mester ta inskribí mas tardá 15 yanüari. I diferente pais den region ta bin aki riba un djasabra pa trah’é.

Por haña mas hóben

Pa loke ta e reakshon Irene ta kere ku esaki por ta mas si kompar’é ku e e kantidat di hóben ku ta bai Hogeschool Rotterdam. E ta kere ku mester tin mas hóben i mayor informá. I no tin mester di skohe pa tur kos pero por ehèmpel pa inskribí, nan tin hóbennan ku ta bini pa inskribí so, òf nan no tin fasilidat di Internet na kas i einan tin laptop i ta duna e hóben sosten. I tur esaki ta grátis. E úniko kos ku tin di paga ta e prueba i pa e trayekto di Subi Jet pa bo Get. I loke ta paga ta masha tiki di loke e hóben i su mayor ta haña bèk. E loke nan ta pidi ta pa kubri gastu di material, kos di kome i bebe i tambe tin e dosente di Hulanda pa sera konosí ku e hóbennan i e dosente ku ta kontinuá ku e trayekto aki ora e hóben yega Hulanda. Esaki komo e promé 6 enkuentronan di subi Jet ta na Kòrsou i e siguiente dosnan ta tuma lugá na Hulanda. E hóben ta haña un sertifikado na Kòrsou i na Hulanda ta kuminsá ku 2 studiepunt. Tin bia e hóben studiante falta nèt e dos puntonan aki pa e por haña su propedeuse i ta nèt esei e hóben ku sigui e trayekto ta haña djis pa tuma parti na e trayekto. Ku esaki Irene a invertí ku e hóben i su mayornan ta besig ta invirtiendo den nan mes. I p’esei e slogan ku ta bisa “Succes zijn is een keuze”, loke ta nifiká ku e éksito di e hóben ta dependé di e eskoho ku e ta hasi. Irene a bisa ku tin hóben ta bin pero e ta kere ku nan por haña mas mirando e kantidat ku ta bai studia na Hulanda.

Hóbennan ta sosialisá ku otro

Irene o por duna un bista spesífiko di kon ta sigui ku e hóben ku a pasa serka nan, na Hulanda pero loke si nan a ripará ta ku e hóben ku sigui e trayekto di Subi Jet pa bo Get ta logra nan propedeuse den nan promé aña. I nan tin un aspirante i part time trainer ku ta bira ku e lo a haña e preparashon tempu di su tempu pero ku e preparashon aki e ta nota ku e hóbennan ta mas habrí. Tambe e subi jet ta duna chèns di sosialisá ku otro, sostené otro. Tin hóben ku ta bai Hulanda pa promé bia i no konosé e kultura pero den e trayekto aki nan a bira un famia. I nan ta rekonosé i mira otro ounke nan ta den otro estudionan, nan ta sostené otro.

Hasié di kurason

I den tur loke nan ta ofresé a Kòrsou, tambe ta yuda e hóben i su mayornan yena nan fiansa pa estudio. Irene a splika ku ta laga e hóben bin einan serka dje na e ofisina di Hogeschool Rotterdam na Saliña Galleries i kaminda e hóben pega e tei pa yuda nan ku nan. Manera e DigiD ku e hóben mester yena pa haña un number, nan ta gui’é pasobra hopi bia e hóben ta yega ku e ta bai un buitenlandse opleiding pero aki no tin esei i p’esei hopi bia einan e kos ta pega. Tin bia e ta haña lista di hóbennan ku tin di pasa prueba di Hulanda i ora e yama nan logá nan a yena kos robes. Ta kosnan ku nan ta pone énfasis riba dje pa e hóben i su mayornan ta konsiente.  For di e promé anochi di informashon ku nan a tene aki Irene a ripará ku mayornan a keda enkantá ku e trabou ku na ta hasi aki. I no pasobra ta Hogeschool Rotterdam pero loke nan ta hasi aki, nan ta hasié di kurason.

Prueba di 21+

E prueba di 21+ ta unu ku a hala nos atenshon. Irene a konta ku e ta pa hóbennan ku tin nivel 3 òf no tin niun opleiding pero nan ta hopi motivá. Bo ta haña kisas un mama hóben soltero òf tambe un tata soltero ku ta haña guia na Hogeschool Rotterdam. Ta duna e mayornan ei oportunidat pa studia. E 21+ e hóben ta traha un prueba i promé ku esaki ta haña algu di añanan anterior pa mira i haña un idea kiko e ta enserá. Si ta estudio na Hulanda e prueba ta na hulandes i si ta na ingles e lo ta na ingles. Nan ta laga e hóben praktiká promé tambe. E promé pruebanan ta den  mart. Irene a bisa di ke plama e hóbennan mas tantu posibel pa asina nan tin oportunidat pa por trein, laga  un hende yuda nan. Meskos ku na e ofisina aki nan tin buki  pa e hóben por prepará su mes. Tambe tin material pa e hóben por prepará su mes pa e prueba ku e tin di pasa. E prueba di 21+ ta varia di e estudio ku e hóben ta bai sigui, pero e kontenido di e prueba ta meskos. Ta sea dominá e hulandes òf e ingles e ora ei por sigui ku e sobrá prueba.

Laga e yu mes skohe

Segun Irene a konta nos, bo ta haña hopi bia e hóben ta skohe un estudio pasobra su mama ta hasié òf tata ta hasié òf e mayor ta pusha e yu den sierto direkshon. E ta kere  komo mayor mester wak kiko e yu ta gusta. E ta kòrda un hóben ku a bai Hogeschool Rotterdam i el a bai studia den direkshon di ekonomia i awor e tin su mes empresa di fitness ku ta kompletamente otro di loke el a bai studia. Ta esei el a sinti pe. I p’esei nos hóben por bira nos fishi pasobra ta abo mester sinti bu bon. I p’esei mes tin e tèst di eskoho di estudio. Tin hóben ta yega einan i no sa kiko nan ke bira. I a base di e tèst ei, e hóben ta skohe pasobra al final ta e hóben mester skohe. I na momentu ku e yu skohe pa un estudio, e ta haña un sita ku e dosente di e estudio ei. Esaki tambe ta sosodé den mart pa aprel. Esaki ta pa mira si e hóben realmente a skohe e estudio ku ta kuadra kuné. E ta un sosten pa e hóben mes pa e ripara si e estudio ta pe òf no. Ounke mester bisa ku 9 di e 10 studiantenan ku a skohe un estudio a skohe esun korekto.

Mas Hogeschool huntu ku otro

I manera nos a menshoná kaba, ya kaba nan trabounan pa e aña eskolar aki a kuminsá. Ta bishitando skolnan. Nan tabata den e feria di trabou. I loke ta masha interesante ta ku nan ta trahando riba e trayekto di mas skol “samenwerkende scholen”ku ke hasi meskos ku nan ta hasiendo aki. Ta trata di e SIE project Samenwerkende Hogescholen. Den dje tin Fontes, Haagse Hogeschool, Vereniging van Nijmegen en Arnhem, Hogeschool Amsterdam, Leiden, Utrecht i Rotterdam mes. Ohalá esaki bira algu pasobra e ta bai pa tur studiante. Nos hóbennan meresé un oportunidat pasobra ta nan ta nos futuro segun Irene.

Kontakto

E ofisina di Hogeschool Rotterdam na Baliña Galeries su portanan ta habri djamars mainta di 8 pa 12 or. Djárason mèrdia di 1 pa 5. Pero e ta adaptá su mes na orario di e hóben i tin bia e ta traha sitanan riba djasabra pa por yuda mas tantu posibel. 7885153 ta nan telefòn ku por alkansá e ofisina.