WILLEMSTAD. – Ayera algu promé ku 12 or di anochi, Sentral di Polis ta dirigí un patruya ku urgensia pa Kaminda Saliña pa un kaso di tiramentu. E informe ta indiká ku lo tin un persona ku herida di bala. Na e patruya su yegada nan ta topa ku un hende hòmber ku un herida di bala na su pia.
E sitio di e suseso ta entre di e skol Amador Nita i Sedreko.
E víktima a duna di konosé na polis ku el a bai tira algu den e área menshoná i direpente un persona a sali i pidié su telefòn. Aki a start un interkambio i e persona a saka un arma di kandela i tir’é. E historia ta un poko vago i no ta konosí for di kua telefòn e víktima a bèl polis.
A transportá e víktima pa poliklínika pa tratamentu, miéntras e investigashon ta kontinuá.
