WILLEMSTAD.- Korte di promé instansia a sentensia e akusado Rock na 18 luna di prisòn pa vários kaso di ladronisia. Fiskal ta akusá e sospechoso Rock di a kometé 9 echo kastigabel ku ta relashoná ku delitonan di robo.
E promé echo ta robo di piesanan di outo riba 24 di òktober 2022; e di dos akusashon ta robo di aparatonan elektróniko, prenda, sèn kèsh i algun kèts, na un kas den Amerikaweg riba 25 di òktober 2022 i ku den e mesun periodo ei a duna òf bende otro persona e bienesnan ei. E di 3 akusashon ta robo di un outo marka Honda i su piesanan, un laptop, televishon, radio i telefòn selular, den e periodo di sèptèmber 2022 i a duna òf bende otro persona e bienesnan aki. E di 4 akusashon ta robo di piesanan di un outo Kia Soul na Van Engelenweg, den periodo di novèmber 2022. E di 5 akusashon ta robo di piesanan di un outo Kia Sportage na Warawaraweg den periodo di novèmber 2022. E di 6 ta robo di aparatonan elektróniko, prenda i tas di lomba for di un kas na Snipweg, den periodo di òktober 2022. E di 7 ta robo di aparatonan elektróniko, kámara di potrèt, telefòn selular i prenda, na Kaya Kokada, den periodo di sèptèmber 2022. E di 8 su partisipashon na un organisashon kriminal den e periodo entre sèptèmber i novèmber 2022 i di a organisá robo kualifiká i hasi negoshi ku e bienesnan hòrta. Echo 9 i último akusashon ta poseshon di arma di kandela den e periodo entre yanüari 2021 i òktober 2022.
Fiskal di ministerio públiko a pidi, inisialmente, un kastigu di 6 aña, ménos e tempu den aresto preventivo, pa Rock. E abogado di Rock, mr. Becher a hiba su defensa pidiendo wes pa Rock haña kastigu solamente pa un di e echonan ku ta kulp’é di dje, ku ta robo di piesanan di outo riba 24 di òktober 2022. E di 9 akusashon riba Rock, wes ta dikta ku Rock ta kulpabel di 3 echo; robo di piesanan di outo riba 24 di òktober 2022 i òf di a duna òf bende un Honda i su piesanan, un laptop, televishon, radio i telefòn selular, den e periodo di sèptèmber 2022 i tambe di poseshon di arma di kandela den e periodo entre yanüari 2021 i òktober 2022.
Tres víktima a pidi daño i perhuisio pero solamente den dos kaso esaki a keda honrá.
Wes ta kondená Rock na un kastigu di prizòn di 18 luna i di paga daño perhuisio na balor di Fl. 2.974,05 na un víktima, i 5.415,15 florin na otro víktima i tambe Fl. 1.902,03 na un víktima. Tur esakinan mas e interes riba e montantenan, kuminsando for di 24 di òktober 2022 te ku e fecha di pago. E montantenan aki respektivamente mester keda paga sea na e víktimanan òf na Pais.
