Posiblemente otro kaso di ‘hit and run’
WILLEMSTAD.- Den oranan di mardugá, alrededor di 01.57’or sentral di polis a haña notifikashon ku tin un hende Hòmber kantu di kaminda riba Gosieweg na altura di eks Las Vegas Supermarket. Mesora a manda un patruya na e sitio pa investigá loke ta pasando, esei bosero polisial sr. Rosalina a informá EXTRA.
Bèrdat a topa ku un hende Hòmber drumi abou, kantu i kaminda, pero ku no ta duna señal di bida mas. A pidi presensia di ambulans, pero e profeshonalnan di ambulans tambe a konfirmá ku e Hòmber no ta duna señal di bida. Dòkter di polis dr. Maduro a konstatá morto 03:05. No a identifiká e víktima ainda.
Den e investigashon preliminar ku outoridatnan a hasi na e sitio por yega na e konklushon preliminar ku ta trata di un kaso kaminda un vehíkulo a dal e víktima. Riba òrdu di ministerio publiko a konfiská e kurpa sin bida pa mas investigashon. Esaki ta otro posibel kaso di ‘hit and run’, kaminda esun òf esnan embolbi den aksidente di tráfiko no ta keda na e sitio pa responsabilisá nan mes. Mas detaye den edishon di EXTRA.
Awe mèrdia polis den un komunikado di prensa a duna di konosé ku na e sitio a haña un parti di un vehíkulo. Probablemente un vehíkulo lo a alkansá e peaton i sigui kore. Tambe a duna di konosé ku e víktima ta Rudsel Luciano Martis , nasé dia 26 òktober 1957 na Kòrsou.
