E ta sospechá ku ta su frei a pone nan den su maleta
WILLEMSTAD.- E akusado Juderick L.C. (24) ayera tabata den sala di korte, despues ku el trata na importá kasi dos kilo di píldoranan XTC for di Jamaica dia 13 di mart último.
E akusado ku ta enkarselá, a bisa ayera ku e dia enkuestion, el a kumpra un maleta nobo pa e por a biaha bin Kòrsou bèk, despues di a bai Jamaica pa un luna largu ku fakansi.
Su frei ku yama Andrea ta esun ku a yud’é drecha e maleta i e ta kere ku el a hinka e píldoranan aden. Na momento ku el a yega Kòrsou, e personal di duana a tuma nota di algu straño den e maleta.
Ora ku nan a listra bon, nan a mira ku e maleta tabatin 3 bòm falsu ku tabata furá ku fòil. Ora ku nan a habri esaki, nan a haña e kantidat di píldoranan menshoná hinká aden. E akusado a bisa ku e no sa nada di e píldoranan.
E akusado tin un karchi kastigu bastante largu di vários delito ku el a kometé. Esaki no tabata e promé bia ku e ta kai pa violashon lei di opio. Ayera e akusado a duna di konosé ku e tabatin un infansia bastante turbulento. Na chikitu el a yega haña su tata morto den kas ku machete den kabes. Esaki tabata algu sigur ku a troumatis’é. El a buska vários yudansa na hopi instansia. Promé ku el a kai será, el a haña un aksidente kaminda el a kibra su pia na tres parti.
El a bai hospital i nan a bis’é ku nan no por oper’é. E sistema kon e pia a kibra, e mester keda operá pafó di pais.
Durante defensa, su abogado a pidi pa apsolvé e akusado di tur kulpa. Segun e abogado, no por proba ku su kliente tabata na altura ku a pone e píldoranan ei den su maleta.
Banda di esaki e abogado a pidi pa tene kuenta ku e situashon personal di su kliente i tambe ku su salú. Fiskal a haña e akusashon kompletamente probá, a base di e píldoranan ku a haña den e akusado su maleta.
Segun fiskal kada ken ta responsabel pa nan maleta i mester kontrolá esaki bon promé ku bai biaha. Mirando e kantidat di píldora ku a haña den e maleta i tambe e karchi kastigu di e akusado, fiskal ta yega na un demanda di 30 luna inkondishonal pa e akusado.
Despues ku wes a bai deliberá, el a haña e akusashon kompletamente probá i ta bai di akuerdo ku e demanda di fiskal.
(File Foto)
