WILLEMSTAD. – Gremio di kabayistanan di Kòrsou ta gradisí Gobièrnu di Kòrsou den kalidat di Minister Gilmar Pisas ku Servisio Veterinario ta kai bou di su kartera komo parti di GMN, ku porfin por importá kabai atrobe for di Colombia. Esaki ta danki na e bon koperashon tambe ku tin awor aki ku dòkter van Ommen ku ta enkargá aktualmente ku Servisio Veterinario na Parera. Kabayistanan ta spera ku e koperashon aki por kontinuá i ku e periodo problemátiko pa ku importashon di kabai for di Colombia ta tras di lomba.
Aktualmente tumando na konsiderashon ku peso kolombiano ta abou, ta un momentu bon ku por importá kabainan bon for di Colombia pa bon preis.
Hopi hende ku tabata ke a importá kabai di paso fino ku defakto ta un di e deportenan ku ta kresiendo, pero e echo ku kosnan tabata wantá no por a importá kabai, o sea kada bes tabatin muchu problema pa importá kabai for di Colombia.
Esaki ta e promé tres kabainan ku a yega despues ku nan a keda e periodo stipulá den karentena na Colombia i ayera ora ku nan a yega Kòrsou, lo mester pasa algun dia aki tambe den karentena i tambe realisá sierto tèstnan riba nan, promé ku nan bai nan finka.
Ayera e veterinario van Ommen tambe tabata presente na aeropuerto ora e kabainan a yega i a guia e trailernan pa Parera kaminda ku nan lo keda e periodo stipulá pa despues nan bai nan finka.
Pues un periodo nobo ku un hefe di veterinario nobo a habri kaminda pa kabayistanan por importá kabai for di Colombia sin muchu opstákulo ku ántes tabatin. Mester enfatisá ku tur kos a bai segun reglanan stipulá i tur kos a kana bon.
Extra a komprendé ku for di dia ku e veterinario nobo a asumí su posishon komo tal, tabatin bon kordinashon ku Servisio Veterinario di Colombia, loke ku a hasi eksportadónan di kabai for di Colombia realmente kontentu ku e desaroyo positivo aki.
Aki na Kòrsou tambe ta reina e espektativa pa loke ta trata importashon di kabai for di Colombia.
Ayera e promé tres kabainan a yega i riba e fotonan ku ta kompañá e artíkulo aki, por tuma nota di karanan kontentu di doñonan di kabai.
Manera menshoná, e kabayistanan di kabainan paso fino ya tin un sèt di kabai ku aktualmente ta den karentena na Colombia, wardando e dianan pasa pa por pone nan riba avion pa Kòrsou. Pues pronto otro sèt di kabai lo yega Kòrsou.
