CARACAS, AP.- E desishon di e gobièrnu venezolano di intervení den e banko privá mas grandi di e pais, despues di e detenshon di 11 di su ehekutivonan a generá insertidumbre entre e venezolanonan djabièrnè, na momentu ku falta dos siman pa elekshon presidensial.
E intervenshon di 90 dia di Banesco a wòrdu rechasá pa e propietario di e entidat, Juan Carlos Escotet, kende a konsiderá ku e proseso ta un “desishon eksklusivamente polítiko, ku intenshon di distraé atenshon di e venezolanonan ku ta sufri di e hiperinflashon, e reseshon ekonómiko fuerte i un skarsedat severo di alimento, medisina i plaka kèsh.
Den un mensahe publiká riba su kuenta di Twitter, Escotet a sostené ku akshonistanan ta mantené propiedat di e banko, ku tin mas di ocho mion kliente i kual ta kontrolá kasi 40% di operashonnan finansiero na Venezuela.
E superintindente di bankonan, Antonio Morales, a pidi klientenan di Banesco pa keda trankil i a konfirmá na e kadena lokal Union Radio ku “tabatin retironan importante” di plaka ku tabata wòrdu di monitòr pa outoridat.
El a agregá ku e entidat ta operando ku normalidat i ta spera ku den dos luna e hunta ku mester intervení ta presentá un informe riba e kaso.
