WILLEMSTAD.- Ayera nochi lat tabatin diferente unidat polisial i asta ku tim di aresto den bario di Seri Mahuma hasiendo investigashon.
EXTRA a haña diferente yamada di abitantenan di e bario ku kier a sa ta kiko ta pasando. E polisnan tabata kana praktikamente kas pa kas i tabata papia ku abitantenan. Te lat sinembargo no a hasi niun detenshon i tampoko a konfiská nada.
EXTRA a papia ku bosero polisial sr. Rosalina i el a konfirmá pa nos ku polis na e momentunan ei tabata na Seri Mahuma. Segun sr. Rosalina muchu e no por bisa ainda ya ku e kaso ainda tabata andando. Pero el a bisa ku ta trata aki di e tim di VVC di polis ku ta trahando riba kasonan di ladronisia.
Den kurso di awe sr. Rosalina lo bin ku mas detaye di e investigashon tumando lugá na Seri Mahuma.
E fotonan ku nos ta publiká aki ta kasnan kaminda e efektivonan polisial tabata pasando i tabata papia ku abitantenan.
