BASORA, IRAK, AP.- E promé minister irakí a ordená un investigashon riba protestanan violento den siudat di Basora, na sùit di Irak, kual a laga vários sivil i militar morto i heridá.
Basora, riku na petroli i otro siudatnan den kurason shiita na sùit di e pais ta protestando desde yüli pa korupshon, desempleo kresiente i servisio públiko pober. E protestanan a bira violento na vários okashoná. Manifestantenan a vandalisá i kima ofisinanan públiko i a tira kòktel Molotov i piedra kontra efektivonan di seguridat.
E situashon a bira grave djamars despues di entiero di un manifestante di 26 aña ku a muri un dia promé. Efektivonan di seguridat ku tabata keda den e konseho provinsial a tira gas lakrimógeno i a deshasí di e manifestantenan ku tabata tira piedra i otro ophetonan.
Por lo ménos tres manifestante a muri i kuater a resultá heridá durante e konfrontashonnan, kual tambe a laga dos polis morto i shete agente heridá.
Den su konferensia di prensa semanal, Haider al-Abadi a lamentá e morto i heridonan entre ámbos banda djamars i a bisa ku “esnan ku provoká violensia” ta pone e siudat na peliger.
