WILLEMSTAD.-Jacinta Constancia eks minister pa partido MFK a entrega su mes un ratu pasá prizòn Koraal Specht pa asina kumpli ku su kondena di 20 luna ku ta pendiente. Den su promé palabranan e eks mandatario a duna di konosé ku e no a tuma despedida di su hendenan di bario awe mainta pasobra e ta bon konsiente ku esaki lo a lanta hopi emoshon serka dje i su hendenan di Boca Sami. Constancia ta bisa mas aleu ku e no ta un ladron, pero un muhé trahadó i p’esei e echo ku awe e ta drenta prizòn no ta nada dushi.
E ta bai pa bini bèk, e ta keda un sòldá di trabou. El a tuma despedida di su mama, ruman i otro hendenan serka pa awe e ta mas trankil. E kos ta fèrfelu. Bario di Boca Sami sa ku Jacinta Constancia no ta hasi nada deshonesto. Den kaso di BZV, outoridatnan a skohe ku mester paga 4.2 mion bèk, pero esnan ku a hiba mal maneho ta sigui kana rònt, esta Yarzagaray, Abdalah i Romer i otronan .
Ta tur tipo di investigashon a hasi riba su persona i a keda demostrá ku e no a haña niun depchi di e sèn ku a saka for di BZV.
Jacinta ta bisa ku e ta hende ku ta traha i yuda hopi hende a yuda. Den e kuadro ei e hendenan ku tabata haña pakete di kuminda ta sigui normal, meskos ku esnan ku ta haña yudansa i guia pa buska trabou. Tur e proyektonan aki ta sigui normal pasobra no por perhudiká e hendenan ei.
Un kos ta bèrdat, hende mester wak 5 punto. Un hende mester wak dilanti pa sa unda ta bai, mester wak den banda pa sa ken tei, wak bo tras pa bo sa di unda ba bin, wak den laira pa korda ku tin un Dios den shelu i wak abou pa wak ken ta trapa. Ku Jacinta Constancia drentando prizòn ta marka e di tres persona, eks minister di partido MFK ku mester a bai prizòn pa sinta kastigu den un kaso penal. Anteriormente tabata Jorge Jamaloodin, sigui pa e lider Gerrit Schotte i awor Constancia.
