Jandino a imponé rèkòrt na Kòrsou ku ‘KEIHARD’
WILLEMSTAD.- Jandino Asporaat djasabra anochi a imponé un rèkòrt ku e presentashon di su show titulá ‘Keihard’ aki na Kòrsou. Ta promé biaha ku un artista kómiko a logra di atraé riba 2500 hende na su presentashon. E show ku na Ulanda tambe a marka historia na momentu ku el a logra di hinka 40 mil hende den ‘De Kuip’ tabata unu variá i ku un konsepto di e presentashon kómiko di Jandino, presentashon di artistanan lokal manera Gino Coelho na inisio dje show, Stanley Clementina i Naomi Silvanie durante dje show. ‘Judesca’ tambe tabata presente i pa finalisá e show ‘Gerrie’ di e pelíkula ‘Bon Bini Holland’ tambe a subi stage pa baila huntu ku e dos músikonan ku a kompaña Jandino durante di su presentashon. Manera kustumber Jandino a sa di entretené e públiko den gran forma i loke tabata mas impaktante durante dje show tabata praktikamente na final na momentu ku Jandino a tuma un ratu pa dirigí algun palabra na e yunan di Kòrsou i e Ulandesnan europeo ku tabata presente. Pa e yunan di Kòrsou e mensahe tabata un di union pa e isla por bai dilanti i sostené bo paisanonan. Pa e ulandesnan europeo el a bisa nan pa no bin traha plaka so na Kòrsou, pero bira parti dje komunidat.