Jerusalema estilo di Kòrsou ku baila di seú

E grupo musikal Den Chikí a kaba di produsí un kansion Jerusalema Curaçao Style. E diferensia ku Den Chikí a hasi ku Jerusalema ta ku a dun’é un toke di seú, un toke kultural di Kòrsou. Shurently ‘Neny’ Domacasse ku hopi  smak a konta di kultura di Kòrsou ku ta asina pegá na su kurason. For di chikí e tabata gusta kultura. E gusta muzik en general. E ta skucha radio i a bai lès di músika (piano, drùmsèt i bass) pero el a keda mas riba kanto finalmente. Neny semper a gusta kultura i bibando den Otrobanda, na Brasami tabatin algun hóben ta trein den Karabileño. El a pidi pa e por djòin nan. I asina e tambe a bai toka ku nan pero dado momentu nan a bisé ku e kantamentu e ta hasi mihó ku e tokamentu. El a kuminsá kanta den Karabileño. Despues el a bai den gaita Los Paranderos. E ku su amigunan a funda e grupo i ei den el a haña chèns pa kanta ku grupo Kòmpèr. E tabata kanta komo invitado i tur toka e ta bai ku nan. El a deseá semper pa un dia e ta den e front di Kòmpèr. Mirando su talento, Alex Molina a hink’é den e grupo i a bai trein tur piesa. El a keda basta largu den Kòmpèr i a keda rekonosé mas den pueblo ei den pa e fama di Kòmpèr. E banda ei tabata toka ritmo seú i ritmo boneriano. A yega un kaminda ku e kier  a bai purba su suerte riba su mes i el a disidí di lanta un grupo. Den prinsipio e no tabata sa e nòmber pasobra ta algu chikí e kier a lanta. Asina e nòmber di Den Chikí a sali. El a haña reklamo ku e nòmber ta muchu simpel i mihó e bin ku algu na ingles. Pero Neny a haña ku  e no tin mester di nada na ingles, su grupo ta pa kultura di Kòrsou i su nòmber mester ta na papiamentu. i asina Den Chikí a mira lus di dia.

Diferente grupo

Neny ta famia boneriano i tin tambe famia Molina tambe ta famia boneriano pero tin otro gruponan kultura rítmiko na Kòrsou ku no ta di desendensia boneriano. Tin Sablika, Hóben na Timon, Konchemba, Oriri,diferente mas  ku ta di hende di Kòrsou mes. Ke men no ta asina ku ta bonerianonan ta esnan ku mas ta lanta e bandanan rítmiko.

Kanta den karnaval tambe

No solamente grupo rítmiko pero tambe Neny a yega di forma parti ku otro bandanan. El a konta nos ku asta el a partisipá algun bia na festival di Tumba ku e no a klasifiká ainda, pero esei lo bin si. I siendo den Kòmpèr tambe Neny a kanta ku Dreams. E ta kòrda ku Axel Pikero a pidié pa  e kos ku e ta hasi den Kòmpèr hasi serka nan den Dreams tambe. A pidié pa e hasi e lokura meskos ku e ta hasi den Kòmpèr. Neny ta fanátiko di Dreams i tur djárason e tabata bai nan fiesta. E kansion Hende Drechi i No Drecha, el a subi ku Dreams i kanta e kansion ei. Sin trein Neny a pone ambiente ku Dreams den Club Bananas. Di einan a sigui ku Road Fire i el a drei e temporada di karnaval ku Dreams.  Neny semper a kanta den un banda durante temporada di karnaval. El a yega di kanta ku Happy Peanuts tambe durante temporada di karnaval i despues di Dreams el a kanta tambe ku Highway Band pa temporada di karnaval.

Kultura ta dushi

Pa loke ta kultura di Kòrsou Neny a konta nos ku kultura di Kòrsou ta dushi. Tur hende ta biba nan kultura na Kòrsou i p’esei lástimamente ku tin un tiki bèrgwensa di dje. Tur kos ku bo ke hasi bo mester di sèn pa hasi i no tur bia hendenan tin e fondo pa pone aktividat kultura henter aña. Pero por mira si ku por ehèmpel karnaval ta kultura i por mira kon hende ta biba nan kultura. Despues di karnaval tin seú i ta un lástima ku e tumba ku ta tende den karnaval no ta tende mas durante di aña. Pero esei ta nos kultura dikon no por biba e tumba henter aña. Bandanan por toke henter aña pa asina tene bo kultura bibu. Na radio tambe por keda tok’é i no mar’é na karnaval so. Tin hopi tumba último tempu ku ta traha ku ménos palabra di karnaval aden pa asina por tok’é henter  aña. Por toka seú tambe henter aña. E ta kere si ku tambú ta pa e temporada di desèmber. Meskos ku aguinaldo na un kultura di Venezuela pero nos a tene duru aki i su temporada ta desèmber. Bo por biba bo kultura henter aña. I p’esei Neny a lanta su mes grupo i ta toka seú mas tantu i e ritmo krioyo boneriano. Den dje tin simadan ku ta manera seú pa asina por promové esei tambe. Na Boneiru si un banda di ritmo kombiná no ta mas gustá ku un banda rítmiko boneriano. E nivel di nan dos ta meskos esei ta mustra ku e kultura na Boneiru ta hopi fuerte.

Fondo pa sostené grupo rítmiko

Neny a bisa ku den e instituto di kultura nobo ku ta bai lanta mester bin un fondo spesial pa sostené gruponan rítmiko. Hende ku grupo rítmiko mester por hasi aktividat i por sostené nan ku studio di grabashon i asina por saka mas piesa na papiamentu i piesa di bo kultura. Kultura no ta ritmo kombiná i tambú i seú so, tin hopi mas. Kultura tin wals, mazurka i tur eseinan ta masha dushi mes. Ora hende bai fiesta di kai òrgel ta tur e piesanan i e ta toka i hende ta baila tur. Nos kultura ta hopi amplio. Tin hende ta bisa ku tin miedu ku e ulandesnan ta limitá e bonerianonan pa nan hasi nan kultura pero nan tin wowo hanchu habrí einan. Te ainda e ulandesnan ta hasi nan kos i e bonerianonan ta hasi nan kos. No ta mete ni stroba e boneriano ku su kultura. Meskos mester sosodé na Kòrsou. Laga e ulandes hasi su kos i nos hasi di nos. Loke ta pidi ta sosten di gobièrnu ku awor ta sera kas di kultura i spera den e instituto nobo pone énfasis riba gruponan di baile i rítmiko i asina por trese bo kultura mas dilanti.

Jerusalema di Kòrsou

Den Chikí a lansa awor aki Jerusalema estilo di Kòrsou esta Curaçao Style.  Neny a bisa ku e ta keda positivo i ta keda push pa kultura di Kòrsou. Ounke hopi hende a pensa ku e no ta logra i hende no ta pidi pa tok’é, ta nan mes tin di hasi pa tok’é na radio i bib’é. Semper ora e ta toka e ta toka kosnan ritmo, na kualke fiesta ku e bai. I semper e ta buska bachata òf merengue tambe pa e toka. I durante di un ensayo el a bisa pa ban toka Jerusalema pasobra  e ta ‘in’ awor aki. Nan a purba i el a kuminsá zona bon. Durante di un toka nan a mira kon hende a reakshoná ku e kansion Jerusalema. E tabata ke baila tambe pero no ku esun original. E kier a hinka den direkshon di seú i laga e baila ta kombiná ku e baila di seú. El a buska un grupo di baile D’art. El a kuminsá e piesa ku e baila original pero despues durante di e kantika a kambi’é pa e zona di seú. Tambe tabata importante pa e laga mira e barí, e chapi i kachu. Neny a kanta e letra manera e ta i den dje hinka e ritmo di seú den dje. I el a titul’é pa riba Youtube e Curaçao Style ku seú. Asina e ta promové Kòrsou i nos ritmo. I asina e ta purba pa e ritmo di seú tambe bira internashonal. Ora a kaba ku e grabashon i edit, Neny a mand’é pa su grupo pa nan dun’é feedback. Pa su sorpresa el a haña e video online i rápidamente e video a bai rònt.  E video ei a haña masha hopi reakshon. Neny tabata haña yamada di tur skina i no na Kòrsou so pero na Aruba tambe ku a kuminsá toka e kansion di Jerusalema estilo di Kòrsou. I tur esaki Neny ta hasi pasobra e ta gosa loke e ta hasiendo, E no ta hasié pa sèn pero hende por sinti serka dje ta su vibrashon di e alegria pa seú. E energia ku e ta saka ei, ni maske e kanta malu hende ta gosa kuné .I esei ta importante pa Neny Domacasse.