WILLEMSTAD.- Fondo Monetario Internashonal (IMF) ta di opinion ku mester kontinuá ku e esfuersonan pa mehorá e atministrashon fiskal di Kòrsou, siguí pa un reforma di e polítika di belasting. Outoridatnan a redusí winstbelasting di 22 pa 15 porshento pa ganashinan te ku 500 mil florin ku e meta pa sostené empresanan chikí. Pero di otro banda lo mester bini ku otro akshonnan si pa kompensá e pèrdida kalkulá ku ta 0.2. porshento di e produkto bruto doméstiko.
Segun IMF, na luna di mei outoridatnan a restablesé e situashon despues di e ehersisionan ku a apliká riba preis di gasolin. A inisiá ku revishon di preis di gasolin i otro derivadonan, pero esaki tambe a trese kuné un kambio riba e loke tabata ser kobrá na Omzetbelasting riba e preis por mayor di gasolin.
Riba término korto lo mester keda enfoká riba mehorashon di e atministrashon riba tereno di impuesto, inkluyendo finalisashon di e restrukturashon di servisio di impuesto i amplia e kapasidat.
Na momentu ku e atministrashon di puesto gana sufisiente kapasidat, outoridatnan lo mester konsiderá reformanan den e polítika di impuesto pa hasi e sistema mas plasentero dor di simplifiká e tarifanan di importashon, move pa e sistema dòbel di entrada personal i remplasá e omzetbelasting ku un ABB. Teniendo kuenta ku e régimen relativamente haltu di impuesto, e medidanan pa kambio di polítika mester ta neutral pa ganashi. Mester pone e gastu i entradanan dje plan den balansa pa introdusí un kobransa outomátiko di e impuesto riba benta dor di bankonan teniendo kuenta ku su kompleksidat. Mas aleu tambe outoridatnan mester bin ku kambionan legislativo pa kita Kòrsou for di e lista pretu di Union Europeo pa loke ta hurisdikshonnan no koperativo.
Tambe IMF ta kere ku, modernisando e servisio sivil esaki lo drecha e efisiensia i kalidat di servisionan públiko. Sierto medidanan ku a ser tumá na 2020 redusiendo e kuerpo di ámtenar i subi e grado di fakansi, a pone un limitashon riba e abilidat pa duna servisionan ku ta esensial i krítiko. E nivel i abilidat di empleadonan públiko mester ta konsistente ku dunamentu di un servisio públiko efektivo.
