Denise de Jongh Rekwest

Kantika di tur tempu pa semper, un buki yená ku kantikanan di ántes, skibí pa Denise de Jongh-Rekwest. Despues di a kumplí 10 aña ku su negoshi di entrenamentu i konsulta, el a disidí pa pone su ekspertisia riba papel i kuminsá skibi buki di etikèt pa mucha. E ta un eskritor konosí riba e islanan Kòrsou, Boneiru i Aruba pa su bukinan tokante etikèt. E plan original tabata pa skibi solamente un buki, pero e buki a risibí tantu elogio ku Denise a sigui skibi. A base di su eksperensia den publikashon di buki, el a funda un kompania ku ta yuda eskritornan nobo pa publiká nan buki. Denise a risibí vários rekonosementu pa su trabou. Na aña 2020, el a risibí Tapushi Literario di Arte di Palabra Kòrsou, i den mesun aña, el a risibí ‘Pipita di Kòmkòmber’ di Arte di Palabra Boneiru.

Orígen di Kantika di tur tempu pa semper

Kantika di tur tempu pa semper ta un buki sumamente yamativo. E kaft di e buki ta hala bo atenshon, pero e kontenido ta loke ta impreshoná bo. Aparte di e buki Kantika di tur tempu pa semper, nos konosé tambe e buki Yerba i Kelly su aventuranan. Denise ta konta ku e idea pa skibi e buki a sali for di un petishon di èks-diputado James Kroon. James tabata deseá un buki ku por preservá nos kantikanan di ántes. Na un banda, e tabata ke e letranan di e kantikanan oral for di tempu di sklabitut bin na tempu di folklóriko, manera Remailo, San Juan i San Pedro. I na e otro banda, e notanan musikal, kaminda musikantnan por wak e partitura.“Mi a haña e idea sumamente interesante, i un bon inisiativa pa preservá nos kantikanan di ántes,” Denise ta bisa. E Departamento di Kultura di Boneiru a duna un man pa e por publiká e buki. Denise ta konta ku el a hasi vários investigashon ku hende grandi, prinsipalmente e hendenan di Rincon i esnan ku ta forma parti di kor. Un persona ku a hunga un ròl hopi importante tabata yùfrou Chemmy (Crispina Cicilia-Janga ta tanta di Tico Balentien). Asina Denise a hasi entrevista serka dje i algun otro hende pa por a komprendé e historia tras di e kantikanan. Kada kantika tin su mes historia, basá riba bida real. E kantikanan aki tabata oral, i ku tempu nan a kambia. Sra. Rose Mary Allen, antropólogo, a duna Denise tepnan kon pa strukturá e investigashon mihó. Algun di e kantikanan, e letranan tabata kambia i Denise no tabata komprendé bon. Rose Mary a splika ku esaki ta dependé hopi di e generashon i di e bario. “Tabata hopi interesante pa mira esaki”, e ta bisa.

Un reto grandi

Denise a skohe pa traha huntu ku un persona di Rincon, Michael Janga di grupo Watapana, pa skucha i transkribí e kantikanan. Esaki, Denise ta splika, tabata un reto grandi, sigur ku e kantika Koló di Kanel. Yùf Chemmy a konta ku un hende a yega di papia di Koló di Karné, i Chemmy a bisa: “Di awor si, nos a yega leu ku koló di kanel!” Denise ta konta e anékdota ku un tiki humor. Asina, mester a hasi transkripshon di 11 kantika, ku tabata basta difísil. E papiamentu ta mayoria bia di Rincon di ántes, ku hopi kontrakshon. “Mi a disidí di laga e letranan manera ku nan ta papi’é. Por ehèmpel, nan ta skibi ‘wega di damanan’, pero nan ta kanta ‘weg’i damanan’,” Denise ta splika. Normalmente den un buki bo no ta usa kontrakshon asina hopi, pero Denise kier a preservá e estilo oral. Huntu ku Laura Quast, Denise a aserká Marta Dijkhof pa wak kon pa skibi e kantikanan mas mihó. Un otro manera ta ku nan ta skibi “no mas”, pero nan ta bisa “no ma”. Tur e palabra ku ta kaba ku “s”, e final ta keda pafó, i a skohe pa pone e zonido den paréntesis, loke normalmente bo no ta hasi, pero a eligí pa traha di e sistema akí. Tabatin hopi kos pa konsiderá na momentu ku tabata skibi. Ora ku e transkripshon i e letranan a kaba, a sigui ku e parti di partitura. Pa e esaki, Denise a skohe: Dennis Aalse, un profeshonal hopi konosí riba e tereno. Esaki tambe tabata un otro reto. E kantikanan tabata hopi diferente kompará ku e kantikanan ku Aalse ta transkribí normalmente.

Preparashon largu

Denise ta bisa ku e tabata un preparashon hopi largu. Dos aña pasá, fin di òktober, el a haña e petishon. E plan tabata pa publiká e buki Dia di Rincon na aña 2024. Lamentablemente e buki a tarda. “Pero ku tempu mi a bin realisá ku tipo di publikashon asina’kí ta bon pa bo tuma bo tempu, komo e ta keda pa semper. I mi tabatin mester di hopi mas tempu,” Denise ta bisa. E proyekto a kuminsá na òktober 2023 i a keda presentá aña pasá den desèmber. Tabatin hopi hende enbolbí den e proyekto, kual Laura Quast ta un di nan. Laura a drenta meimei di e proyekto. Denise ta konta chistoso, ku e tabata bèl Laura pasó e no tabata komprendé kiko nan ta bisa den e kantikanan. Asina Laura a bin gusta e proyekto i a disidí di forma parti di e buki, te ku el a skibi un parti di e tradishon oral. Den su maestria di papiamentu, el a hasi investigashon tokante kuenta oral. “E ta hopi interesante i nos a modernis’é,” e ta bisa. Kada kantika den e buki tin su mesun QR code, kaminda bo por skèn pa por skucha e músika. E buki ta konsistí di 11 kantika i tur kantika tin su propio QR code. Di e manera akí e generashon nobo por mantené e letranan original. “Nan por hunga ku e palabra, pero ta importante pa semper tin e vershon original i sa e historia,” Denise ta enfatisá. Ora bo hasi algu fin di aña, nan ta kanta bo den tambú. I si bo hasi algu despues, nan ta kanta bo den San Pedro òf San Juan. Banda di tur e persona nan enbolbí, tabata tin un otro señora, Engracia Coffie-Piard (Gacha), mas konosí komo Gacha, ku tabata kanta den kor. Hopi di e kantikanan tin dòbel sintí, ku un ekspreshon folklóriko riku. Engrasia a yuda pa analisá e nifikashon di e kantikanan den dòbel sintí.

Instrumèntnan di ántes

Denise ta sigui bisa ku e kaft di e buki ta mashá bunita. E buki ta diseñá pa un artista konosí di Boneiru: Nochi Coffie. Nochi ta pinta masha bon, i el a inkluí tur e instrumentonan di ántes, manera barí, kuarta, kitara, marimba (ku ta bini dor di Venezuela), i un par di maishi, paso hopi bia tabata kanta e kantikanan despues di kosecha. Hopi hende ta puntra kiko Remailo ta nifiká, paso hopi bia nan ta kanta e den tempu di kosecha. “E ta un kantika data for di tempu di sklabitut,” Denise ta splika. Remailo ta un meskla di idioma Afrikano i Indjan. Nan a kuminsá kanta: “Hurémailo”. E palabra ta bin dor di “hurá”, i nan ta kanta e na diferente manera. Su nifikashon ta: “un danki na Señor pa e kosecha.”

Kiko e buki akí ta nifiká p’é

Denise ta bisa ku na promé lugá ora nan puntr’é si e por a skibi e buki, e mester a pensa, pasó músika no ta su kos. Pero loke e sa ta ku e por skibi i e tin hendenan profeshonal huntu kuné pa yud’é. E ta sigui konta ku el a siña hopi di músika, inkluso kon pa skibi partitura. El a siña e reglanan ora ta rèk palabra. Na momentu ku bo ta rèk e palabra, bo no ta skibi yen di lèter. Bo ta pone un strepi ku ta indiká e areglista kon largu mester rèk e palabra. Ademas el a haña kada historia tras di e kantikanan hopi importante, pasó nos ta kanta e kantikanan sin sa kiko nan ta nifiká realmente.

Rekuerdonan bunita

Tur e kantikanan ta dushi i ta trese rekuerdonan masha bunita. Pero esun ku Denise ta haña mas prèt i ku el ta tene serka di su kurason ta e kantika di Buchi Marti. Buchi Marti ta bai tokante dos amigu ku tabata traha den Washington i nan a bai yag huntu. Den e historia, un ta bisa ku yuana por landa i e otro ta bisa ku yuana no por landa. Un tabata yama Buchi Marti i e otro tabata yama Om Filipi. P’esei e kantika ta yama asina. Ora nan a bai tira e yuana, e yuana a kore limpi bai i ora nan a yega kas, nan no tabata tin nada pa kushiná. Tambe, el a gusta e kantika di Belua, ku ta e un pòpchi. Belua ta e spantapara, ku ta representá e doño di kunuku. E pòpchi muhé yama Shi Maria. Tur bia ku nan ta kòrta maishi, nan ta bai bèk na kunuku. Tin bia nan ta usa palabranan di ántes ku nos no ta usa mas. I esaki ta importante, pasó asina tambe nos ta preservá e palabranan di ántes,” e ta enfatisá. Denise ta konta un otro anékdota: “Dina Baro trimintí. Ántes solamente hende hòmber tabata bula kandela. Pero Dina a bai bula i su saya a pega na kandela!” Kada kantika tin su historia, su trasfondo. Tur ta parti di un pueblo ku ta kanta pa konta, i Denise ke siña nos pa nos skucha e kantikanan aki pa nos komprendé.

Invertí pa preservá kultura

E buki aki ta disponibel pa Biblioteka Nashonal, tur skol i tur músiko di Boneiru. Biblioteka di Kòrsou i di Aruba falta pa risibí e buki Kantika di tur tempu pa semper. Ademas, e buki ta optenibel na ‘boekhandel’ Bruna. Denise ta konta ku un momento ku e no lo lubidá tabata ora Hary Moon mes a tuma un buki serka dje, kaminda el a firm’é. “Mi a haña hopi elogio pa e buki. Tin artistanan grandi na Aruba ku tin e buki kaba. Mi ta haña bon ku Gobièrnu di Boneiru a invertí pa preservá nos kultura.” E buki ta pa e hubentut. “Na Boneiru no tin ku wòri ku nan no gusta e kantikanan. Pasó e muzik akí ta hopi gustá i bo ta haña hopi mucha ta partisipá aktivamente dia di Rincon.” Denise ta spera ku Kòrsou i Aruba tambe por haña e mesun oportunidat pa preservá nan kantikanan, pasó nos kultura ta importante.

Ya a kuminsá ku e di dos parti

Denise ta menshoná ku ya el a kuminsá ku parti 2 di Kantika di tur tempu pa semper. E plan ta pa sigui krea mas buki, di kual e ta hasi esaki ku smak. Den e segundo tomo, bo ta haña kantikanan un tiki mas nobo, inkluso di tempu di guera mundial, kolonialismo i rebelion. Tin un kantika di Ana Thode, ‘Bati Aleman’, ku ta hopi prèt pa sa kiko nan ke men ku ‘Bati Aleman’!” E ta konta ku tin un otro ku yama ‘Saka Papa’, ku tabata referí na Papa Godett i ku na Boneiru nan tabata boga pa saka Goddet. Pero alabes, na Boneiru mes el a deskubrí ku tabatin un otro mener ku tambe yama Papa. Esaki ta un muestra ku e kantikanan di ántes ta konta un historia tantu di Boneiru komo di Kòrsou. Den pasado e kantikanan tabata papia algu ku a sosodé, kompará ku músika di awor. Tin bia ta difísil pa nos komprendé, pasó den tempu di sklabitut nan mester a usa kódigo. Nan no por a bisa presis kiko nan tabata ke, komo nan no tabata ke pa e shon komprendé. Mayoria bia, nan tabata tira puña pa e shon.

E di 24 buki skibí pa Denise

Ku orguyo Denise ta bisa ku Kantika di tur tempu pa semper ta di e di 24 buki ku Denise mes a skibi. Den un periodo di 17 aña, el a skibi i publiká 24 buki di su mes i 50 otro buki pa diferente instansia. Pero su obra no ta para ei. Tin un otro proyekto hopi bunita di Laura Quast pa e futuro benidero. I tin un buki pa mucha ku yama ‘No kere mes’, tokante aventura di muchanan. Den e buki di mucha bo ta haña un kombinashon di ilustrashon di potrèt di para ku Denise mes a saka. El a skohe 9 para, kaminda e ta siña nos muchanan kon yama e paranan i kon mester kuida nan.

Pashon

Denise su pashon, su konsistensia i su amor pa e e pueblo ta algu atmirabel i bo ta sintié den kada palabra. E ta terminá ku e frase “proyektonan manera Kantika di tur tempu pa semper ta minimalisá e riesgo kaminda letranan por kambia di generashon pa generashon. Ku obranan manera esaki, nos ta duna un aporte real na e konservashon di nos historia riba tur tres isla.”