SAN FRANSISCO, AP.- Kas Blanku a deklará “indigná” djárason pa un desishon hudisial ku a blòkiá e desishon di gobièrnu di presidente Donald Trump pa pone fin na un programa ku ta duna amparo na hóbennan inmigrante di deportashon.
E sekretario di prensa Sarah Huckabee Sanders a bisa den un komunikado ku e desishon di hues William Alsup ta “indignante, spesialmente despues di un reunion bipartidista eksitoso di e presidènt ku miembronan di Kámara di Representante i Senado den Kas Blanku e mesun dia”.
Sanders a bisa ku e asuntu mester wòrdu “tramitá atraves di e proseso legislativo normal” i a primintí ku Trump “lo traha ku miembronan di ámbos parti pa yega na un solushon permanente”.
Alsupa impedí kanselashon di e programa DACA miéntras nan demandanan ta wòrdu resolvé den korte.
E abogadonan fabor di e programa a demostrá klaramente ku e hóbennan inmigrante “probablemente lo sufri un daño serio, ireparabel” si no tuma akshonnan hudisial, segun Alsup. E hues a señalá ku e abogadonan tabatin bon perspektiva di gana den huisio.
DACA a protehá 800.000 persona trese ilegalmente den Merka di deportashon òf ku a keda den e pais despues ku nan famia su visa a vense. E sifra ta inkluí sentenar di míles di hóben ku edat pa studia den universidat.
E sekretario di Hustisia, Jeff Sessions, a anunsiá den sèptèmber ku lo tin un kanselashon gradual di e programa, indikando ku e eks presidente Barack Obama a sobrepasá su outoridat dor di introdusí esaki na 2012.
