WILLEMSTAD – Djamars 27 di febrüari 2024, alrededor di 03.33’or, Sentral di Polis a dirigí unidatnan polisial i di brantwer pa un adrès na Sisalstraat pa un kas ku tabata na kandela.
Na momentu ku e unidatnan a yega na e adrès, nan a bin topa un kas di palu kompletamente na kandela i a komprondé ku den un kamber tabatin un dama drumí.
Despues ku brantwer a paga e kandela kompletamente, a bin topa ku un kurpa di un dama karbonisá.
Tambe a konstatá ku parti di un kas situá den Laufferstraat a haña daño di e kandela.
Dòkter di polis ku a hasi akto di presensia, a konstatá morto di e dama Glenda Maria Klooster nasé na Kòrsou dia 17 di mart 1945.
Kousa di e kandela ainda no ta konosí i investigashon den e kaso ta kontinuá.
