Junya Fecunda I Kimberley Specht

Djaluna awor dia 15 di yüli ta estreno di e programa Kitchen Talks riba Plataforma digital di EXTRA. Junya Fecunda i Kimberley Specht lo papia riba tur tema na interes general. Djis imaginá sintá den kushina i temanan ta sali un tras di otro. I awe den Djasabra nan a duna nos un pida di kiko por spera den Kitchen Talks.

Ban ‘trigger’ e hende

“Kitchen Talks a kuminsá na kas. Ami ku Kim ta topa ku otro riba un djaweps i nos ta papia over kon e dia a bai i e ta konta di susesonan na trabou i den bida i mi tambe ta papia di trabou. I papiando mi a bisa Kim ku loke nos ta papiando nos por pone un kámara den kushina aki pa komunidat  skucha kiko nos ta papiando kon nos ta papia aki i no pa konsientisá pero pa ban aktivá e komunidat”, Junya a splika. El a bisa ku loke e ta eksperensiá for di e trabou ku e ta hasi, el a bisa Kim ku tin bia hende no sa kiko ta pasando i no tur ora e por tuma nan na malu. Pero si hende no bisa kiko nan ta hasi i kon pa drecha, nos ta keda den e sirkulo visioso i e lo keda parti di esun ku ta keda reklamá. I e kier forma parti di e kambio i no kambio di ban papia i bisa kiko bo tin di hasi pero esaki no por. I for di Junya su banda, e trabou ku e ta hasi komo reklutadó pa kompania ku ta buska hende òf hende ta buska trabou i e ta para mei mei di nan dos. I aki e ta referí na e forma kon e hende ta presentá su mes, kon e ta skibi karta, kon e kombersashon di solisitut ta bai. I einan el a ripará ku hende no por papia di nan mes. Hendenan di 50 i 60 aña ku no konosé nan mes. I si bo no konosé bo mes, kon ami ta esun ku por bisa e kompania ku abo ta esun korekto pa tal i tal trabou. I esaki no solamente pa e hende ku ta buska trabou pero tambe for di e kompania ku tin bia tin e aktitut ku ta e hende mester di trabou, kosnan ku ta pasa tras di kortina ku no por i niun hende ta sali papia i bisa. I esei ta loke Kitchen Talks ta bai hasi esta ‘trigger’ hende i limpia alma.

E triángulo

Kimberley ta Social Pedagogisch Hulpverlener. Pa Kimberley e echo ku nan kombersashon awor lo bai ku un kámara nan dilanti no ta nada otro for di normal pe. E úniko diferensia segun Kimberley den nan kombersashon awor ta ku tin un mikrófono presente. E kombersashonnan lo sigui manera e ku Junya a bin ta hasi. I den e programa aki lo papia di mayoria tópiko. Nan lo tene e triángulo di oro i manera Junya a splika, e ta bin di e parti di HR esta trabou, e preguntanan ku ta hasi i di otro banda e hende ku ta bai solisitá ku tin nan pasado i kiko awor. E kos mester kuminsá na kas, sali kuna bai skol i despues a buska trabou. Nan ta trata e influensia di kas riba e hóben/e mucha ku ta krese i bira e adulto. E influensia di skol i e influensia di trabou riba kas. I p’esei e triángulo pasobra tur ta influensiá otro. Den su kas, sali for di e sektor di enseñansa, e ta haña e resultado di kiko e mayor a hasi òf keda sin hasi na kas. I miéntras tantu komunidat ta grita ku Kòrsou no tin trabou sin sa ku ta e hende mes ta stroba su mes di haña trabou.

E promé impreshon

Entre otro Kitchen Talks ta pone énfasis riba skibi karta di solisitut. Esaki ta e promé impreshon i  e ta hopi importante. Esaki sigur lo ta un di e episodionan di Kitchen Talks ku e pregunta “Bo ta kere skibimentu di karta ta stroba bu di haña trabou?”.  Junya por ehèmpel ku ta den HR a bisa di ta atendé hopi ku kartanan di solisitut i e por mira bo kla esun ku a skibi e karta i esun ku Google e karta. Pero no ta mara ku ta Google bo karta pero si bo ta solisitá pa directie secretaress ta un funshon ku bo tin di skibi mail. I einan ta wak e manera kon e hende ta solisitá i e ta bai bèk por ehèmpel na Kim ku den su trabou ta atendé ku hopi enseñansa na skol.  Den un episodio ta papia kon importante idioma ta. Nos a siña skibi karta na skol. Por ehèmpel awendia ku ta WhatsApp esei tambe ta skibi pero awor aki ta skibi mas korto posibel. Esun ku ta ‘durf’ pa ekspresá su mes i ta skibi ta keda kategorisá komo skibi beibel i ta wak e for di e punto di bista negativo sin sa ku ora yega na skibimentu, bo mester di dje. Por ehèmpel Kim ta bin den kontakto ora e persona ta terminando su estudio i e tin di skibi. Skibimentu ta kos laf pero mester hasié pa por traha e skrepsi. I esei ta netamente e triángulo di oro. Si na kas bo no a siña skibi i na skol tambe esei, finalmente si bo tin di skibi un karta di solisitut, bo ta keda rechasá pa e forma ku e karta ta keda skibí. Tin funshonnan ku e skibimentu ta masha importante. Einan por mira unda e komunidat a keda pega i eseinan ta molestiá Junya su kurason.

Ta representabel

Otro ehèmpel den Kitchen Talks ta solisitut di resepshonista. Komo resepshonista bo ta e promé impreshon di e kompania i bo ta drenta “onverzorg”, bo no tin kontakto di wowo. E karta por ta bon skibi pero ora e hende yega, e mester ta kara di e kompania pero e promé impreshon no ta bon.  Reakshonando riba e punto di “onverzorg” nan a bisa ku e promé kos ku e hende mester ta ta limpi. Su kabei peñá i un paña ku bo no ta bai fiesta anochi kuné pasobra ta trabou ba bai buska. No mester bisti flus pero si bisti na drechi. Tin hende ta bai solisitá ku paña di kas, slòf na nan pia i no ta hasi esfuerso pa nan oura ta limpi i representabel. Otro ehèmpel ta ku e telefonista ta importante kon ta bisa bon dia. Tin hende ta kue telefòn i no ta bisa ni bon dia pasobra ta abo a bèl.

Téknikanan moderno

I refiriendo na téknikanan moderno ku ta usando awor aki manera e ChatGPT, Kimberley i Junya a mustra ku esun ku hasi uso di e sistema ei pa skibi su karta di solisitut, ora e yega e kombersashon mes, nada por sali for di su boka. I ku un hende asina nan ta ripará mesora. E tipo di hendenan ei ta papia mitar frase. I tin hende ta haña e kos ei inkonfortabel ora e haña pregunta tras di pregunta pero ta esei ta un kombersashon di solisitut.

Verbalisá bon

Kitchen Talks ta mas bien pa ‘trigger’ e hende ku e no ke ta asina mas. E no ke pa hende wak e asina mas. E hende mester sintié bon. Kimberley i Junya mes ta ‘trigger’ otro den e programa. E ta pa e komunidat i pa nan mes tambe. Nos mester di otro. En bes di dividí mester yega na otro. Kòrsou tin trabou i hende por pero mester haña nan. Meskos ku por haña un hende ku tur tipo di diploma mester tòg no por ekspresá nan mes bon. Si e hende no por verbalisá, ta tantu bal. Kitchen Talks tin masha hopi tópiko. Den buskamentu di trabou tin hopi kos mará na otro, manera di skibi, papia, presentá, kon ta komportá pafó di trabou tambe ta hunga un ròl. Meskos ku tin kosnan den solisitut ku no por. No por ta asina ku un hende ta bai buska trabou un kaminda, i e kaminda ei ta yama su otro trabou pa bisa ku el a bai buska trabou serka nan. E kos aki ta robes!  E tipo di aktitutnan aki ta stroba e hende di progresá.  Otro tópiko ta miedu di kambio di trabou.

Protehá bo mes ta stroba bo mes

Refiriendo na e triángulo ku tin kas tambe den dje, nan ta haña hende ku ta si i no nan ta kontesta kuné. I ora sigui buska pa sa ta bin tende ku e hende aki a hañ’é ku situashonnan na kas na chikí ku ta pone ku e tin e aktitut ei awe. Por ehèmpel ku hende hòmber no ta papia hopi, hòmber no mag di yora i esei ta pone ku nan ta sera nan mes. Nan ta forma un fòrti rònt di nan pa protehá nan mes i esei ta netamente loke ta stroba e hende mes di bai dilanti.

E resultado di nos mayornan

Refiriendo na e tema ku mas nan a papia den nan kombersashonnan den kushina, a bin dilanti mayornan. E millenials ta otro generashon, nan ta e resultado di e edukashon di nan mayornan. I  tur kos ta bai kai bèk den kas, mayornan ku no por a ekspresá na chikí, mayornan ku miedu di dal otro paso, miedu di kambia di trabou, no tabatin mag di yora, mayornan ku inkonsientemente ta kibra un mucha su soño. Sinta den kushina Junya mes a keda konfrontá ku e Kòrsou di awe. Por mira e resultado di esun ku nunka a Sali for di Kòrsou, esun ku a bai studia na Latino Amérika, Na Merka i Hulanda. Por mira kiko kultura ta hasi ku komunidat. I nos kultura di ketu bai keda papia di Tula no ta yuda nos ku nada, nos hendenan ta keda biba den rabia, nos a keda pegá den tempu. E tópiko ku mas nan ta toka ta e punta di e triángulo ku ta kas.

Kitchen Talks ta djaluna 15 di yüli pa 2 or di mèrdia riba plataforma digital di EXTRA Facebook i You Tube i por alkansá nan riba nan página di Facebook i Instagram ku ta Kitchentalks Curaçao.