WILLEMSTAD.- Tim Multidisiplinario konsistiendo di ROP, Domeinbeheer, Brantwer, Aqualectra, MEO i BAB a bai un kontrol den Picoestraat na Marie Pampoen pa kontrolá un konstrukshon ku a bai for di òrdu.
EXTRA a papia ku hefe di e tim Multidisiplinario pa BAB sr. Angelo Pichardo i el a splika ku enbèrdat ayera mainta nan a bai Mari Pampoen den Picoestraat pa un kontrol. Nan a keda yama pa tim multidisiplinario i einan a haña un edifisio ku ta dos bou di un dak i algun konstrukshon ku tabata bai ariba, ku segun por a komprondé, nan a keda hasí sin e pèrmitnan nesesario i sin tene kuenta ku e parti di seguridat.
Sr. Pichardo a splika ku e tabata mustra un konstrukshon peligroso i si surgi un aksidente hende su bida por kore peliger. Tabata un kas ku eiden tin hürmentu di kamber. Lo mester hasi mas investigashon kiko ta pasando einan. No por a haña un bista bon kla ta kiko tur tabata sosodé na e kas enkuestion. No por a bai paden komo bibienda pero mester hasi ehersisio pa wak kiko ta pasando.
Sr. Pichardo a sigui bisa ku si wak e konstrukshon, tin kosnan ku no ta kuadra. Ayera e doñonan di e kas mester a reuní ku ROP i brantwer pa wak kiko ta e partinan ku mester keda kita, pa asina e ta unu sigur den e terminologianan di brantwer.
Tambe mester a investigá si tur e konstrukshonnan ku a keda hasi, ta kumpli ku pèrmitnan.
Sr. Pichardo no ta na altura kiko a sosodé ku tur e personanan ku tabata biba den e edifisio aki. Pero BAB lo chèk kuantu hende ta biba einan, kiko ta kobra pa hür pa atendé ku e doño di kas tambe i asina e responsabilisá pa e ingresonan.
