WILLEMSTAD.- Kòrsou tin un minister di Hustisia nobo. Awe merdia a huramentá Shalten Hato komo minister. Despues di huramentashon dor di gobernador Lucille George-Wout Hato a duna su promé deklarashon na prensa. E minister nobo a splika ku e tin hopi gana di e trabou nobo. Un di su prioridatnan lo ta problemanan den kuerpo polisial, pero tambe Hato ke atendé ku kriminalidat bou di hòben, problemanan den SDKK i maneho di detenshon di hende indokumentá den baraknan.
Hato a duna di konosé ku e ta bon na altura ku Kòrsou tin hopi reto. E tin eksperiensha den mundu di hustisia. Na aña 2016 el a finalisá su maestria di derecho konstitushonal i atministrativo na Erasmus Universiteit Rotterdam, despues ela regresá bèk Kòrsou kaminda ela uni ku e bufete di abogado “Soliana Bonapart & Aardenburg Attorneys At Law” den e funshon komo abogado. Na 2017 Hato a kuminsa fungi komo Landsadvocaat pa diferente ministerio, entre nan ministerio di Hustisia. Mirando e trabou desplega a aserká Hato na 2020 pa drenta e tim di maneho di Servisio di Atmishon fungiendo komo “Hoofd Beleid & Juridische Zaken”. Den e ròl aki Hato tabata (ko)responsabel pa e maneho general i asuntunan huridiko di Servisio di Atmishon. Banda di esaki Hato a fungi komo direktor suplente den ousensia di e direktor. Den e funshon aki Hato a sinta hopi ku diferente departamentu ku ta kai bou di e minister di Hustisia i ta pone ku e tin konosementu amplio I vasto riba kiko ta e puntonan di atenshon den e Ministerio aki.
