Giovanni Atalita

Otro siman, kuminsando dia 28 di òktober ta habri pa promé bia Krioyo Film Festival. E ta primintí di bira algu grandi segun un di su inisiadónan Giovanni Atalita a konta Djasabra. Krioyo Film Festival ta algu úniko pa motibu ku pa promé bia lo tin un siman di pelíkula di diferente produktor lokal. Ta pelíkula kòrtiku, largu i dokumentario. I ta masha bunita pa bo por mira un ruman, un primu, un bisiña ta aktua riba pantaya grandi. Nos ta un di e islanan masha bendishoná den e parti di edukashon, kaminda nos ta siña hulandes, ingles, i spañó banda di papiamentu. Nos por  sinta wak pelíkulanan den e idiomanan ei i komprondé 90%. Dikon 90%, segun Giovanni  sea tin un dicho, un frase ku bo no ta komprondé pasobra e idioma no ta di bo. Papiamentu si for di e promé te último palabra bo ta komprondé tur kos. Ta einan mester yega pa engrandesé e mundu sinematográfiko di Kòrsou.

E mundu sinematográfiko

E mundu sinematográfiko ta parti den diferente elemento. Tin esun ku ta skibi e historia, esun ku ta produsí, esun ku ta aktua riba loke a wòrdu trahá pa nan graba. Ta un mundu kresiendo na Kòrsou sigur e ta ofresiendo. Si ántes tabata 2 aña pa traha un pelíkula, ku teknologia moderno e ta bai lihé. E ta habri e oportunidat pa despues di e promé edishon sigui krese pa mas produkshon ku mas i mas pelíkulanan lokal.

Bida ta un aktuashon

Kreatividat ta saliendo mas i mas den nos hendenan na Kòrsou. Ta un talento ku tin skondí i awor nos hendenan ta sakando esaki. Giovanni a konta nos ku e mes a pasa den dos pelíkula i nan dos tambe lo keda estrená den e festival aki. Bida mes ta un aktuashon pasobra ora bo haña bu den pèrtá bo tin di aktua pa sali for di dje. Ta un mundu fasinante pasobra bo tin di lesa skript pa drenta den e hende ku bo tin di aktua.

Un fundashon ku diferente pata

Krioyo Film Festival ta un fundashon. E ta konsistí di Giovanni komo presidente, Orlando Martina ta e direktor tékniko, Mark Aniceto komo sostenedó, Angelique Joubert i Janice Welhous. Nan 5 ta na kabes di e organisashon ku ta trèk e festival. E fundashon Krioyo Film Festival ta algu grandi ku tin diferente pata. Un di nan ta e festival mes, e otro ta kaminda lo bin ku lektura ku hendenan di afó pa yuda siña nos hendenan avansá den e mundu sinematográfiko. I e di tres pata ta pa establesé un studio pa filmashon. Ta plannan grandi pasobra lo establesé relashon ku film festivalnan internashonal. Resientemente segun Giovanni e tabata na New York kaminda el a presensia e di 62 edishon di New York Film Festival. La wak hopi kos ku por imitá aki. E wil tei kaba i por hasi uso di dje na nos sistema i manera.

Siman emoshonante

E siman di festival lokal mes  ta di 28 di òktober pa 3 di novèmber. I nos ta papia aki di 29 pelíkula ku ta pelíkula kòrtiku largu i dokumentario. Lo tin 15 blòk i a hinka 3 pelíkula den kada un. Pelíkula kòrtiku di 10 pa 15 minüt no ta sufisiente pa mira un so i a kombiná 3 den un. A yama kada blòk na nòmber di hende Krioyo. Junny, èts., èts. nòmbernan krioyo. Den kada blòk lo tin 3 pelíkula. Tin blòk ku un pelíkula so pasobra ta un pelíkula largu. Asina a hink’é den otro ku ta hasié interesante i mas fásil pa hende skohe kua nan ke bai wak.

Kasi un aña di preparashon

E pelíkulanan lo pasa riba pantaya di Caribbean Cinemas na Sambil kual Giovanni ta masha gradesido ku nan pasobra manera nan a presentá e proyekto nan a bras’é mesora. I asina nan por a dal bai ku un proyekto ku a kuminsá for di yanüari di e aña aki.  E promé presentashon tabata na mei e aña aki kaminda a lansa tur kos pa asina por a entregá pelíkula i awor nan ta na e luna di bèrdat ku ta òktober. E dianan ta aserkando pa Krioyo Film Festival bira realidat.

Bira grandi

Na 2034 ora nan kumpli 10 aña ta intenshon pa nan ta un di e tòp film festivalnan den Karibe segun Giovanni a bisa Djasabra.  Pero tabata fásil pa yega na e pelíkulanan pa e festival? Riba e pregunta aki Giovanni a bisa ku tin hopi hende ta traha pelíkula i e mes por a wak resien 48hours i tabatin 17 hende ku a entregá pelíkula ku a keda trahá den 48 ora. I asta tin hende ku no a logra pasa nan pelíkula pero a pidi pa bai den Krioyo. Pero nan a preferá tene separá di otro. I pa esun ku no a logra e aña  aki tin otro aña pa traha un idea i bin ku e pelíkula na papiamentu.

29 pelíkula

Ora tuma nota ku a yega den tempu kòrtiku na 29 pelíkula lokal ku lo subi pantaya di Krioyo Film Festival, ta un indikashon bon kla di kuantu talento i kreatividat tin den pueblo. I p’esei Giovanni a bisa ku e fundashon tin un pata ku ta bai atendé e parti ei. Nan lo aserká instansianan pa yuda den formashon. Formashon ta importante den desaroyo di tur kos. Si haña hendenan eksitoso por desaroyá un hende mas mihó komo sineasta den trahamentu di pelíkula.

Atenshon pa Papiamentu

Pa hóbennan bishitá e festival Giovanni a bisa ku nan a aserká skolnan voral esnan ku ta duna klasnan di papiamentu pa por wak e pelíkula den dia pa stimulá e hóbennan den papiamentu. Nan tin pelíkulanan di Kòrsou di Aruba. Intenshon tabata pa tin tur isla di ABC pero no a logra ku Boneiru e bia aki.

Unifiká pueblo

Giovanni ta konosí den prensa, e ta músiko i tambe awor den pelíkula. El a bisa ku miéntras e tin bida ku salú e lo sigui traha pa kosnan interesante den komunidat. Edat ta subi i mester bai trankil pero e drive tei. Pero e kos aki ta algu nobo i ta spera ku asta por hal’é un siman mas. Ta interesante manera el a bisa kaba pa mira un konosí riba pantaya grandi. No tin nada mas mihó pa sostené bo kompatriotanan. Meskos ki ta bai na bòshi pa mira pelíkula di aktornan interesante awor por haña mira ken ta aktua i ken a traha e pelíkula delantá i bai wak e. E mester ta katalisadó pa unifiká e pueblo aki. Nos pueblo ta hopi dividí i esaki ta oportunidat pa djòin huntu i apoyá aktor i produktonan lokal. Sinti orguyoso di ta yu di Kòrsou i ku produkshonnan den bo mes idioma.

Kadushi di oro

Di 28 di òktober pa 3 di novèmber pueblo di Kòrsou ta keda invitá pa Krioyo Film Festival (KFF) 2024.

E festival aki no ta solamente un evento di sine, pero e ta un selebrashon di nos idioma, nos kultura, i nos identidat komo pueblo. Sineastanan di Kòrsou i Aruba a traha duru pa krea produkshon na Papiamentu, ku lo reflehá nos historia, nos bida di dia pa dia i nos perspektivanan. KFF ta sumamente orguyoso pa duna nan un plataforma kaminda nan trabou lo por bria.

For di e 28 di òktober te 3 di novèmber, na Caribbean Cinemas Sambil, lo tin presentashon di un surtido amplio di pelíkulanan ku lo mustra diversidat di nos kreatividat. KFF no solamente ta lansa un festival, sino un moveshon pa duna rekonosementu na talentonan lokal ku por i ku pa hopi tempu no a risibí e atenshon ku nan meresé. Un otro aspekto esensial ku nos ta introdusí durante e festival aki ta e “Premio Kadushi di Oro”. E premio aki lo ta unu ku lo duna rekonosementu na e mihó produkshon, direkshon i aktuashon lokal. E premio aki lo ta un símbolo di ekselensia den e industria di sine na Papiamentu i lo stimulá kreatividat i inovashon aden nos komunidat artístiko.

E komishon organisadó forma pa Orlando Martina,  Angelique Joubert, Mark Aniceto, Janice Welhous i Giovanni Atalita ta kere ku Krioyo Film Festival lo sirbi pa promové nos idioma, forma brùg den e region  i stimulá mas kolaborashon den e industria di sine lokal i internashonal. Nos sineasta, aktor, i produktornan di Kòrsou, Aruba i sigur den futuro Boneiru tin e kapasidat pa inspirá nos pueblo i pa traha den nivel global. E festival aki lo ta e trampolin pa esaki.

Presensia i kontribushon di pueblo di Kòrsou ta esensial pa e éksito di e Krioyo Film Festival 2024.