WILLEMSTAD. – Mirando e echo ku ta drentando último simannan di aña, Kuerpo Polisial di Kòrsou ta lansa kampaña di konsientisashon pa fin di aña. Esaki mirando ku den e último añanan, sifranan a proba ku e último luna di aña, e kantidat di kasonan di atrako, ladronisia di outo i ladronisia den kas òf negoshi ta subi drástikamente.
E siman aki Kuerpo polisial a kuminsá pone énfasis riba ladronisia di outo. Segun Signald Burnet, Hefe di e Departamentu di Robo di Vehíkulo a splika ku ladronisia di outo a bira manera algu normal den nos komunidat. Esaki tin trahamentu di sèn su tras tambe.
Ladronnan ta kue vehíkulo, plum’e òf ta buska moda di hasi esaki legal pa por subi kaya bèk ku esaki. Tim di Joyriding tin nan man yen. Tim di Joyriding ta konsistí hendenan dediká i ku ta traha duru pa atendé e kasonan. Manera e informashon yega serka nan, nan ta sali bai atendé ku esaki. Den mayoria kaso, shofùrnan ta haña nan vehíkulo kompletamente plumá òf no ta hañ’é mes mas.
Si kompará ku ladronisia di vehíkulo ku atrako, den kaso di atrako mayoria biaha e víktima por duna sierto informashon ku por yuda outoridatnan kuminsá kana. Den kaso di ladronisia di vehíkulo, mayoria biaha no tin nada di informashon. P’esei ta hopi importante e koperashon di parti di komunidat.
Un kaso resien tabata kaminda bisiñanan a tuma nota di un kran ku a sali for di un kurá ku kaska di un vehíkulo. A resultá ku nèt a kaba di pluma e vehíkulo i tabata hibando e kaska di outo “Scrapyard”.
P’esei Tim di Joyriding tin algun tep di sumo importansia pa prevení ladronisia di vehíkulo;
- Stashoná vehíkulo den kurá i semper di lòk.
- Bon iluminashon kaminda e vehíkulo ta keda stashoná.
3. Presensia di kachó semper lo alertá presensia di intruso den kurá.
4. Porta di kurá mester tin bon kadena i kandal. Nunka laga remote di kurá den outo! Esei ta hasi trabou di e ladronnan muchu mas fásil.
5. Stashoná vehíkulo kaminda tin aktividat di hende i bon iluminashon.
6. Nunka laga nada di balor den vehíkulo.
7. Ora abitantenan ta bai afó, nunka laga vehíkulo den kurá sin hende ta wak esaki.
Kiko por hasi?
- Pone un lòk di stür riba bo vehíkulo. Esaki por pone ladronnan pensa dos biaha si nan ke mishi ku e vehíkulo.
- Instalá un “Kill Switch”, ku ta un suich ku ta pone ku e outo no ta start, esta e ta kita tur konekshon di koriente.
- Instalá GPS, esta por lokalisá e outo despues o por sigui ruta di e outo ora e ta den moveshon.
- Instalá immobilizer, esaki tambe ta un aparato ku ta evitá e outo start si no usa e yabi legítimo pa start e outo. Mayoria vehíkulo nobo tin e instalá. Dado kaso esaki no ta e kaso, tin kompania ku ta instalá.
- Sòru pa un BON sistema di alarma.
Esaki ta algun punto di importansia.
Pa mas informashon por sigui e página di Facebook di Kuerpo Polisial di Kòrsou; https://www.facebook.com/KuerpoPolisialKorsou òf por yama e departamento di robo di vehíkulo na; 724-6230-724-6232 durante oranan di ofisina òf despues di esei via sentral di polis na 911 òf 917.
