WILLEMSTAD.- Warda Kosta a para un boto riba laman i den kontròl a dal den basta droga. Segun e informe di Warda Kosta, banda di e droga nan a detené 3 venezolano i pasa nan pa polis.
Den ora nan di mardugá di djasabra 27 di aprel, Sentro Marítimo Operashonal (MOC) di Wardakosta, a tuma nota di un boto sospechoso riba laman, den área nort ost di Kòrsou. Inmediatamente a notifiká tripulashon di e Cutter ‘Jaguar’ pa aserká i investigá esaki.
A konstatá ku ta trata di un lancha tipo ‘yola’ ku tres (3) hende hòmber di nashonalidat venezolano i tambe diferente pakete a bordo. A transportá e lancha ku su kontenido i e personanan i a hiba nan base, pa kuminsá ku un investigashon. Despues di a kontrolá e lancha i tur e paketenan, a konstatá ku ta trata di aproksimadamente 170 kilo di kokaina. E tres (3) persona i e droga, a ser entregá na miembronan di Kuerpo Polisial di Kòrsou, i entretantu tur droga a ser destruí.
