WILLEMSTAD.- Den fin di siman tabatin un post ta sirkulá ku EXTRA lo no a kumpli ku pago di un ganador di e kampaña Gana ku Extra. E premio tabata di 1050 florin. EXTRA sigur no ke bai desakreditá e persona/señora, pasó tin tur komprenshon pa su doló i tambe su desapunto di no por a kobra e premio. Pero si tin algu ku EXTRA ta orguyoso di dje ta e reputashon pa kumpli ku tur ganador di tur kampaña.
Atraves di añanan ta míles i míles di ganadó a kobra nan premio. Un motibu ku EXTRA semper ta saka potrèt na entrega di premio, pa demostrá ku ta kumpli i ku no ta trata di un engaño. Esaki ta maneho di EXTRA pa kumpli ku ganadónan di e diferente kampañanan pero tambe pa kumpli ku kreditornan.
EXTRA sigur no ke bai daña su reputashon pa 1050 florin. Durante covid mester a suspendé entrega di e formularionan den buzonnan pafó di ofisina di EXTRA. Despues di covid a opta pa no habri posibilidat pa mas buzon. Despues di hopi petishon di tantu tokonan komo lektornan pa fasilitá entrega di formulario, a habri algun posibilidat tòg, apesar di tur e riesgonan manera entre otro den e kaso aki ku formulario no ta yega EXTRA.
E prosedura ta mará na vários ‘deadline’ pa garantisá tur seguridat. Un persona ta pasa rekohé tur formulario, unu pa parti pariba i otro pabou. Tur formulario ta keda entregá na EXTRA. Aki otro persona ta surti e formularionan. Ta sigurá nan te na momentu ku numbernan sali na Wega di Number Kòrsou. Djei otro persona ta kontrolá pa ganador.
Si no tin ganador, formularionan ta keda bon wardá sigur pa 24 ora pendiente si tin reklamo. Den e kaso aki tabata asina i a bolbe repasá tur formulario, pero pa nada no a haña e formulario di e señora. A laga esun ku ta rekohé e formularionan bai bèk i kontrolá i wak pa mas formulario. Atrobe no a haña nada. Na EXTRA a bolbe repasá tur formulario pero nada i a konkluí e proseso ku lamentablemente no por hasi nada mas pa e señora. EXTRA ketu bai tin tur formulario di e dia wardá. Esaki ta trese kuné ku ta importante pa bolbe repasá e prosedura i reevaluá kon ta sigui padilanti ku buzonnan pafó di EXTRA. Nos ta lamentá sigur loke a sosodé pero al final no por a yega na niun otro konklushon.
