Gobièrnu di Kòrsou no tin sufisiente fondo pa trayekto digitalisashon
WILLEMSTAD.-Trayektonan di digitalisashon den e aparato publiko tin prioridat di minister Ornelio Martina, enkargá ku e Ministerio di Gobernashon, Servisio i Planifikashon. E minister a informa Parlamento ku e puntonan ku tin prioridat, pa e periodo 2023 – 2024, den mayoria kaso ta kanando kaba.
Minister Martina
Pa ser mas spesífiko e mandatario a duna di konosé ku a prolongá e kontraktnan ku e ‘programmamanager’ i ‘projectmanager’ di digitalisashon pa 2024 pa asina kontinuá ku ehekushon di e roadmap pa digitalisashon. Ta asina ku na 2023 a determiná kua ta e proyektonan di digitalisashon ku tin prioridat: Eseinan ta introdukshon di un direktorado di informashon (directoraat informatievoorziening); Introdukshon di identidat digital (e-herkenning); Introdusí Microsoft 365 pa henter e aparato públiko; Kuminsá implementá e sistema di ‘secure data exchange’ i introdusí pago digital.
Otro punto di importante ta pa ehekutá e plan di akshon pa introdukshon di un direktorado di informatievoorziening ku a keda aprobá na 2023. A kuminsá implementá e plan di akshon di introdukshon di Microsoft 365 ku a keda aprobá na 2023.
A prepará i aprobá e plannan di akshon pa e otro áreanan di prioridat pa digitalisashon manera E-herkenning; Secure data exchange i Pago digital. A finalisá e plan di operashonalisashon di direktorado di ‘informatievoorziening’ ku e ‘transitiemanager’ ku a kontratá ta trahando riba dje;
Ta duna kontenido na e ròl di ‘centrale regie’ pa ku digitalisashon di ministerio di BPD. A kontinuá i finalisá e inventarisashon di e situashon real di e hardware i software di e henter e aparato públiko. Mester traha un ‘business case’ pa digitalisashon di e aparato públiko ku lo bira e base riba kual ta bai buska finansiamentu. Gobièrnu di Kòrsou no tin sufisiente fondo disponibel pa esaki. Den e kuadro ei ta huntu ku ministerio di BZK i VNG (Hulanda) ta bai traha riba un aplikashon pa bini na remarke pa finansiamentu di mas aña pa e trayekto di digitalisashon di e aparato públiko for di e fondo di Nationale Groeifonds di Hulanda.
Mayoria di e aktividatnan menshoná ta kanando kaba, hustamente pasobra nan tin prioridat. Tin ekspertonan kontratá ku ta dunando un man. Tantu ekspertonan lokal i hulandes. Pa loke ta trata fondo pa e trayekto di VFO Hulanda i Kòrsou a pone fondonan disponibel. Na fin di 2023 Konseho di Minister a bai di akuerdo pa aloká fondo pa e trayekto di VFO. Durante 2024 lo kompletá e plan di finansiamentu.
Pa loke ta trata e trayekto di digitalisashon no tin sufisiente fondo disponibel. Debí ku e trayekto tin prioridat i ta importante pa gobièrnu bai buska fondonan eksterno. A menshoná entre otro e Nationale Groeifonds di Hulanda. Durante 2024 mester bini mas klaridat riba e finansiamentu di e trayekto di digitalisashon.
