KENTUCKY, AP.- Algun ora despues di e tiroteo ku a kosta bida di dos studiante den un skol sekundario di Kentucky, un senador estatal republikano a hasi pura pa presentá un proyekto di lei pa prevení futuro tragedianan similar, segun e mester permití presensia di mas arma den skolnan.
E proyekto di senador Steve West ta permití e distritonan lokal pa tin seguridatnan armá pa patruya e skolnan, efektuá arestonan sin òrdu hudisial i protehá e hendenan di morto òf leshonnan físiko grave. E agentenan di seguridat no mester ta polis, por ta empleadonan di distritonan di skol ku pèrmit pa karga arma skondí.
E proyekto ta reflehá e eko ku ta lanta den tur dos partido ku sentimentunan di un estado konservador kaminda polítikonan ta papia di arma solamente den nan propagandanan elektoral i kaminda National Rifle Association a realisá su kongreso nashonal na 2016.
Algun demókrata ta pensa ku ta un eror pa trese mas arma den skolnan. E legisladó estatal Attica Scott a presentá un proyekto ku ta prohibí e poseshon di armanan na personanan kondena pa delitonan di odio rasial i permití pa munisipionan aprobá leinan ku ta obligá e bendedónan di arma pa apliká normanan komersial responsabel.
E legisladó Jim Wayne a presentá un proyekto ku ta kastigá penalmente e adultonan iresponsabel ku ta warda un arma sin lòk riba e gai, un medida pa impedí ku muchanan i adolesentenan yegá na armanan di nan mayornan.
E tiroteo di djamars na e skol sekundario di e kondado di Marshall a laga dos studiante morto. 14 herido di bala i otro heridonan durante un korementu i trapamentu di otro pa asina hui di e atakante.
Miéntras e tiroteonan ta multipliká den skolnan, e legislatura estatal den henter e pais ta diskutí kon pa prevení esaki. Algun di nan ke leinan ku ta difikultá pa yega na armanan i pa bai ku esakinan skol. Otronan entre nan algun demókrata ke oumentá e kantidat di persona outorisá pa karga arma den skol, keriendo ku ku esei lo yuda wanta esnan ku ke tira.
