KHARTOUM, SUDAN, AFP.- Mas ku un mion di mucha, entre nan 270.000 na Darfur, mester a hui di e kombatenan entre ehérsito i e paramilitarnan na Sudan. Asina UNICEF a informá, avisando ku e muchanan aki ta biba den un “pesadia”.
“Dos luna di guera na Sudan a kousa desplasamentu di mas ku un mion di mucha, inkluyendo 330 ku a muri i mas ku 1.900 ku a resultá heridá”, segun indikashon di Fondo di Nashonnan Uní pa Mucha den un komunikado ku a wòrdu publiká djaweps.
E representante di UNICEF na Sudan, Mandeep O’Brien, a kondená “e pesadia den kua e muchanan ta biba” ku “ta karga e peso di mas grandi den e krísis aki”.
Segun UNICEF, mas ku 13,6 mion mucha mester di yudansa humanitario den e pais afrikano. Entre nan, 620.000 ta sufri di desnutrishon agudo i mitar di nan por muri si nan no risibí tratamentu rápidamente, segun e organisashon a atvertí.
E kombatenan a start riba 15 di aprel entre ehérsito, dirigí pa e hefe general Abdel Fatah al Burhan, i paramilitarnan di e hefe general Mohamed Hamdan Daglo. Nan a hinka e pais, un di esnan di mas pober na mundu, den un krísis grave.
