Heidi Kristel van Goens (Lotus Studio)

Heidi Kristel van Goens ta un eksperto den medical thermography, doño i fundadó di Lotus Studio. Heidi a kuminsá ku medical thermography, un forma nobo di kuido preventivo na Kòrsou, na novèmber 2024. Heidi ta duna pueblo di Kòrsou e oportunidat pa monitoriá nan salú proaktivamente i sin método invasivo. E medical thermography tèst no tin radiashon, no tin kontraste di líkido i bo no mester pasa infuse. Bo no ta sinti nada. E método di termografia ta algu nobo na Kòrsou, pero mundiálmente e ta rekonosí, tantu den Europa komo na Estados Unidos. E método ta un sinergia entre ‘westerse’ I kuido ‘holístiko’ di salú. E tèst no ta anatómiko manera MRI, ekografia òf mamografía, e ta mas fisiológiko, komo e ta wak kon e kurpa ta desaroyá den término di temperatura. “Termografia por detektá un problema promé ku e bira un malesa króniko. E tèst anatómiko ta wak e malesa ora e ta visibel. Termografia ta pone e base pa un evaluashon mas profundo,” Heidi ta spliká. Por ehèmpel, si den bo famia tin historia di diabétis i termografia mustra patronchi di inflamashon, esaki por indiká un estado di pré-diabetes. Dor di e resultado di e tèst, bo por tuma akshon proaktivo pa kambia bo dieta i estilo di bida promé ku e malesa sigui desaroyá. E tèst ta duna bo e oportunidat pa tuma prekoushon di bo mes, promé ku bo bira diabétiko.

Termografia/Thermography
Termografia ta un método no-invasivo pa detektá inflamashon den e kurpa humano. “Mi ta duna kliente i hende e oportunidat pa detektá i monitoriá nan salú den un manera proaktivo i preventivo,” Heidi ta bisa. Estudionan ta indiká ku nos temperatura básiko ta rònt di 37 grado Celsius, bou di kondishon normal. Si tin desviashon for di e temperatura, esei por indiká ku tin un aktividat no regulá ta sosodé den e kurpa. Heidi ta splika ku kurpa humano ta konsistí di un banda robes i un banda drechi ku normal ta den balansa. Si e termografia mustra asimetria entre e dos banda, ta un resultado ku bo kurpa ta luchando pa drechá e desbalansa, i ku bo salú por ta afektá. E téknika moderno aki ta midi temperatura i studia e patronchinan térmiko, ku por duna un indikashon tokante bo estado di salú, inkluso síntomanan ku no ta visibel aún.

Kon e proseso ta funshoná
Mayoria di nos, konosé e método di MRI òf otro ekiponan médiko ku nos ta asosiá ku hospital. Termografia, alkontrario, no ta un mashin manera un MRI òf otro sorto tèst ku nos konosé. Hopi hende ta kere ku e ta e mesun tipo di tèst, pero esaki no ta e kaso. Heidi ta splika ku e ta un aparato hopi sofistiká, un sistema di kámara “infrared, ku ta midi temperatura di e kurpa. E ta usa un sensor pa detektá bo estado di salú a base di e temperatura ku bo kurpa ta emití. Tin diferente tipo di estudio den ‘medical thermography’. Por ehèmpel: Chest & Breast Study, ku ta enfoká riba pechu i kurason. Half Body Study (upper body), di lombrishi bai ariba, inkluso bo brasanan. Half Body Study (lower body), di lombrishi bai abou, inkluso e pianan. “Esaki ta hopi útil pa hende ku ta sufri di doló den pia, rudia òf ènkel,” Heidi ta bisa. E ta sugirí hende ku ta sufri di asma òf problema di stoma pa hasi un Half Body Study di upper body. Ademas, tin Health Study, ku ta midi henter e kurpa sin man i pia. Si un persona ke wak spesífikamente su kabes i torso, esaki tambe ta posibel. E opshon kompletu ta e Full Body Study, ku ta kubri henter e kurpa inkluso man i pia. “Hopi bia, kliente ta opta pa esaki, paso nan ke sa kon nan kurpa ta pará den e término di estado di salú,” Heidi ta bisa. Por último, tin e opshon di Individual Region Study, ku ta útil pa hende ku ta sinti doló spesífiko na rudia òf ènkel. “Mi ta ripara ku hende grandi ta selekshoná esaki hopi bia, paso e ta bai direktamente riba e área kaminda nan ta sinti e problema,” Heidi ta menshoná.

Nada di radiashon

Termografia no ta usa radiashon, i bo no ta sinti nada. E ta yuda bo haña klaridat i konfirmashon di e doló ku bo ta sinti, i e progreso di bo salú. Hopi bia, si un hende a traha proaktivamente ku un dietista, a kuminsá kome mas salú, hasi mas deporte, redusí strès òf tuma masashi, bo por mira un desaroyo I un indikadó ku bo ta riba e bon kaminda. E resultado ta duna bo trankilidat i konfirmashon.

Hasi un ‘nulmeting’ promé bai operá

Heidi ta sigui splika ku ta dependé di bo estudio, e tèstnan por dura entre un ora te dos ora, komo Heidi ta duna e kliente e oportunidat pa hasi pregunta. A base di kiko e kliente ta deseá, huntu, ta determiná e orario, pero esaki ta un máksimo di dos ora. Si bo a kaba di hasi un operashon òf bo tin un malesa, bo por hasi e tèst. Ta rekomendabel, Heidi ta bisa, si un hende ta bai hasi un operashon, pa hasi un nulmeting, pa asina por wak kon bo estado di salú ta promé. Ora e operashon kaba, tin un periodo di rekuperashon. Semper palabrá ku bo dòktor di kas òf spesialista pa pèrmit pa hasi tèst despues di operashon. Bo ta bin hasi un follow-up pa wak kon leu bo ta den bo proseso di rekuperashon. Un operashon ta nifiká ku ta bai kòrta den e kurpa i esaki ta generá inflamashon. Si un hende hasi un tèst, i e no a informá ku el a hasi un operashon den su rudia, Heidi por mira esaki riba e imágen. Pa e motibu aki ta semper rekomendabel pa bo ta honesto den bo historia médiko. Tin bia e kliente ta lubidá ku nan a hasi un operashon hopi aña pasá i mas despues ta indiká esaki. Nan por yama despues, pero Heidi mes por mira den e imágen i por deskubrí ku algu a sosodé ku e no tabata na altura di dje, òf ku e persona mes a lubidá. E por sirbi komo konfirmashon di loke a pasa, òf informashon nobo pa siña kiko ta e kousa di bo doló.

Dòkter ta interpretá imágennan

Heidi ta splika ku e mes no por diagnostiká un kliente. E ta traha huntu ku dòktor ku ta interpretá e imágennan. Ora ku un kliente yega serka Heidi, ta kuminsá ku un kuestionario di bo historia médiko, pa wak kon e kliente su estado di salú ta. E siguiente stap ta pa saka e portrètnan térmiko i wak e kliente su historia médiko. Por ehèmpel, si un persona tabata tin un aksidente di outo i ta sinti doló den su skouder, e posibilidat ta grandi ku nos ta mira e inflamashon den e área ei. Pero si e persona no tin historia di problema den su skouder, esei ta informashon nobo ku por hustifiká un evaluashon mas profundo. E portrètnan ta bai na un médiko òf un di e médikonan ku ta spesialisá den interpretashon di termografia. Nan ta manda un rapòrt ku nan konstatashon i sugerensia. Den e rapòrt ta indiká kiko e kliente por hasi pa traha preventivamente riba su salú. Heidi ta traha un sita ku e kliente, i huntu ta pasa dor di dje. Den Heidi su ret di kontaktonan, e ta traha ku varios mèdiko i spesialista. Loke Heidi tin outoridat pa hasi, ta referí e kliente na su dòktor di kas, ku despues por referí e na e spesialista korekto. A base di e informashon di e rapòrt, Heidi ta duna konseho. Por ehèmpel: “Ta rekomendabel pa hasi un evaluashon adishonal.” E desishon ta keda den man di e kliente huntu ku su dòktor pa wak kiko nan ke hasi ku e informashon. Heidi ta bisa ku e tin klientenan ku a kuminsá ku un nulmeting i despues di tres luna a bin bèk pa hasi un estudio di follow-up. Ta bon pa mira e proseso di bo mes, kon bo estado di salú ta mehora. Tin kliente a bai traha ku un dietista, a kuminsá hasi e gym, kome mas salú i tuma masashi. Serka e klientenan aki, e inflamashonnan a baha gradualmente.

E tèst aki ta sirbi manera un monitòr personal ku bo mes i bo médiko, pa mira kon bo ta desaroyá den bo propio proseso di salú.

Un proseso priva

Ora un tèst tuma lugá, e preferensia ta pa e kliente so ta presente, komo e ta un proseso privá i konfidensial. Si ta un menor di edat, su mayornan mester ta presente. Si ta un hende grandi, e tin ku duna pèrmit eksplísito si un otro persona ta bai kompañ'é. Tin hopi situashon, por ehèmpel, un yu ku su mama; òf resientemente, dos ruman ku a bin huntu pa duna apoyo moral, paso e proseso por ta un tiki tenso. Ora e persona kaba di hasi e tèst, Heidi ta laga e kliente wak e imágen, paso e sa e situashon por trese nerviosismo, pero e ta menshoná ku e ta preferá di warda dos siman pa e rapòrt ofisial. E ta haña kliente ku ta bisa: “Heidi, mi no a drumi henter anochi promé ku mi a bin.”

Heidi ta laga nan wak e imágen, pero e ta bisa kla ku e no ta den posishon pa duna un diagnóstiko, mester warda riba e interpretashon di un dòktor di kas òf un spesialista. No ta manera ku ora e tèst kaba e ta mustra e imágen i bisa ku algu no ta korekto. Pa e kliente, e proseso ta duna un ‘peace of mind’, un tipo di rekonosimentu ku lo ke e ta sinti, realmente tin un base. Esaki so ta un paso grandi pa direkshon di klaridat i konfirmashon.

Un mundu nobo a habri

Heidi ta splika ku semper e tabata tin un interes mas profundo den métodonan holístiko pa kuido di salú. E mes ta un persona ku ta bai gym tres bia pa siman, hasi yoga, baila hopi i kome salú. Ademas, komo su hòbi e ta un fotógrafo profeshonal, I e pashon ei a habri porta pa e den e mundu di imágen. Na un sierto momentu el a bai spesialisá su mes den otro tipo di imágen, i asina el a deskubrí medical thermography den eksterior. For di kuriosidat, el a bai hasi e estudio, paso e tabata interesá pa sa kiko e ta realmente. Mi a puntra: "Kiko mi mester hasi pa bira un spesialista den medical thermography?", Heidi ta bisa. E ora ei, henter un mundu nobo a habri pe. Pa logra esaki, e mester a sigui un trayekto di formashon ku ta inkluí konosementu di médiko básiko, un rekerimentu esensial pa e área aki. El a siña tokante di anatomia di e kurpa humano, fisiologia i patologia, ora bo ta traha ku kliente, e ta importante pa bo por interpretá, orientá i komuniká na un manera respetuoso i informá.

Despues di su formashon, Heidi a invertí den su ekipo i habri su mes práktika na Kòrsou, ku hopi pashon i kompromiso pa duna e komunidat e oportunidat pa traha preventivamente riba nan estado di salú.

Tipo di imágen den e estudio
Bo por haña un atvertensia, òf indikashon di inflamashon. Un malesa tin vários nivel. Si bo ta na un nivel haltu, e ta hustifiká bo pa hasi mas evaluashon. Pero si bo ta na un nivel abou, proaktivamente bo mes por reversá esaki. E ta duna bo un peace of mind di: "Ei, mi tin algu, pero mi mes por traha na dje." Heidi ta bisa for di su funshon, si e mira ku ta nesesario, e mester duna e kliente e señal pa bai serka su dòktor di kas òf su spesialista pa sigui un kaminda di tratamentu. Heidi ta sigui konta ku e ta keda den kontakto ku kada kliente. Mayoria bia, promé ku e aserka nan bèk, e klientenan mes a tuma kontakto kune, paso nan ta kurioso pa sa. E ta konta ku e tin un kliente ku ta bèl puntra: “Ki ora bo ta disponibel?”. Dependé di loke a mira den e interpretashon di e rapòrt, nan por hasi un siguiente tèst despues di 3 luna, 6 luna, òf 1 aña. Den e temporada ei, nan por tuma kontakto ku Heidi, i e tambe ta sigui tuma kontakto ku nan, pa wak kon e proseso di nan salú a sigui.

Termografia no ta mira órgano pero inflamashon

Tin hopi médiko ku ta habrí pa método holístiko, i tin otro ku aún ta skeptiko. Medical thermography ta forma parti di un sinergia entre medisina westerse i holístiko. Importante pa komprondé ta ku termografia no ta mira órgano, sino e ta detektá inflamashon den e area rònd e òrgano. Por ehèmpel: si bo no mira indikashon di inflamashon serka di bo kurason, pero e kliente tin historia familiar di atake di kurason, ta konsehá e kliente pa hasi un kontrol mas profundo ku su dòktor di kas òf un kardiólogo.Termografia ta sirbi manera un tèst preventivo i sikológiko. E ta hustifiká pa e kliente bai hasi evaluashon mas profundo manera MRI òf echo. E método aki, bo por mira e komo parti di un kadena preventivo.

Kiko tene kuenta kuné, ora ta bai hasi un estudio di thermography

Pa garantisá resultadonan konfiabel, bo ta haña un instrukshon spesífiko promé ku bo bin. Algun di nan ta:

No bai gym un dia promé, e aktividat físiko por kousa inflamashon den spirnan.

No kome 2 ora promé ku e tèst.

No usa produkto ku zeta riba bo kurpa, manera loshon òf make-up.

Wanta bo kabei ariba, pa por mira e área nan ku tin ku keda monitoriá.

Evita di usa deodorante, e por tapa temperatura natural di bo kurpa.

Tur esaki ta pa garantisá ku e kamara “infrared” por haña un imágen konfiabel i ophetivo di bo estado di salú.

Por sigui Heidi riba Instagram: lotusstudiocw  òf https://appt.link/lotus-studio-j9mYbO0P