WASHINGTON, AP.- Tabatin kasi 5.000 denunsia di intimidashon i abusu seksual kontra menornan migrante den refugionan manehá pa e gobièrnu di Merka a lo largo di kuater aña, segun indikashon di datonan ofisial dibulgá djamars.
E akusashonnan publiká ta inkluí kontakto inadekuá i videonan pornográfiko.
E datonan di departamento di Salú i Servisio Humano (HHS) a inkluí informashon di Donald Trump i Barack Obama su gobièrnunan. E fecha ta data desde òktober 2015 i sèptèmber 2018.
HHS ta na enkargo di kuida míles di menornan integrante. Mayoria a krusa frontera sin kompaño di un adulto. E menornan ta wòrdu mantené den e refugionan pa despues wòrdu entregá na un tutor, kual normalmente ta un famia.
E funshonarionan ta bisa ku mayoria di e akusashonnan no a wòrdu konfirmá i ta defendé e atenshon ku mayoria menor migrante ta risibí den e refugionan.
“Esaki ta un preokupashon pa nos”, asina Jonathan White, funshonario di HHS a bisa. E ta na enkargo di reuní menornan ku nan mayornan. “Nos ta kumpli ku tur lei ku Kongreso a aprobá, i nos ta orguyoso di e trabounan ku nos a hasi pa kumpli ku tur regulashon, inkluyendo referí tur denunsia pa esakinan wòrdu investigá. Gran mayoria di e investigashonnan no a wòrdu sostené”.
