WILLEMSTAD.- Den 2024 mester renobá un kantidat grandi di pasport. Sinku biaha mas tantu pasport kompará ku 2023. Asina gobièrnu di Kòrsou ta indiká den su kontestanan riba pregunta di parlamento durante tratamentu di presupuesto 2024 den reunion di Komishon Sentral.
Na 2023 tabatin un total di 3.780 pasport ku a kaduká. Pa otro aña gobièrnu ta kalkulá ku mester traha 19.900 pasport nobo. Diferente frakshon den parlamento a hasi pregunta durante tratamentu di e presupuesto di Ministerio di Maneho di Gobernashon, Planifikashon i Servisio Públiko (BPD) riba oumento di e suma presupuestá pa “Paspoorten en Leges”.
Segun parlamento ta trata di un oumento di 100 porshento, esta un suma èkstra di 1,2 mion florin. Gobièrnu den su kontesta ta bisa ku e oumento di e suma presupuestá ta a base di e kantidat di pasport ku ta kaduká otro aña i ku mester kambia. Esaki debí ku na 2014 a adaptá e durashon di balides di un pasport nobo.
Gobièrnu Hulandes a oumentá esaki di 5 pa 10 aña. E pasportnan ku un balides di 10 aña ta kuminsá kaduká otro aña i pa e motibu aki gobièrnu ta antisipá un oumento enorme den kantidat di pasport nobo ku mester laga traha. Ta antisipá mas aleu ku departamento di asuntunan públiko di Kranshi durante próksimo 5 aña lo ta sumamente okupá ku un oumento den kantidat di petishon pa saka pasport nobo.
E oumento aki ta nifiká ku Kòrsou mester paga mas sèn na Hulanda pa laga traha e pasportnan nobo. Gobièrnu den su kontestanan ta bisa ku e oumento den petishon pa pasport nobo lo nifiká ku den 2024 mester paga 858.400 florin na Hulanda. Sobra di e 1,2 mion florin èkstra na gastu riba e pòst “Paspoorten en Leges” ta pa oumento den gastunan operashonal manera hür di edifisio i gastunan di seguridat.
