El a tuma awe lugá mèrdia 1 minüt pasa di 2’or
WILLEMSTAD.-Un ratu pasá Servisio Meteorológiko a emití un boletin spesial pa anunsiá un temblor aki na Kòrsou. Ta resultá ku vários hende a sinti e temblamentu di tera, pero no a preokupá muchu. Meteo ta indiká ku por a sinti un temblor na Kòrsou. Mesora a duna konseho pa siudadanonan tuma media di prekoushon manera; Prepará pa evakuá tur playa i área plat na kosta; Marineronan ta ser konsehá pa no drenta bahianan te na momentu ku un mensahe di “ NO TIN PELIGER DI TSUNAMI” a ser emití; Si bo ta paden durante di un temblor, buska protekshon bou di muebel fuerte, òf drumi abou i tapa bo kabes, den kaso ku bini mas temblor; Si bo ta pafó durante di un temblor, buska un lugá habri i drumi abou; Si bo ta den vehíkulo durante di un temblor, hala na kantu, i evitá palu di lus i koriente i brùg, si ta posibel.
Entretantu Meteo ta informa ku e temblor tabata 1 minüt pasa di 2’or di mèrdia ku un magnitut di 3.6 riba eskala di Richter. E profeshonalnan di Meteo ta splika ku esei ta un nivel hopi abou pues no tin motibu pa pániko. Mas aleu tambe Meteo a splika ku anteriormente den e luna aki nan a registrá mas temblor leve e.o dia 19 di mei último ku un magnitut 4.2 na nort ost di Caracas. Dia 13 tambe tabatin un temblor ku magnitut di 3.1 riba eskala di Richter.
