Dia 22 di ougùstùs 2019, sin sa kon bin Nathanael Nato Esprit koriendo su motersaikel riba Schottegatweg Nort na altura di Goisco a habri wowo i a hañ’é bentá abou tur na sla. “Dia 22 di ougùstùs ta un dia ku mi no ta lubidá. Mi a pasa den un aksidente ku basta konsekuensia pa mi. Pero un kos mi por bisa. Na bida mi ta i na bida ta konta i mi ta gradesí na e hòmber ei riba ku mi tei. No importá nada mester wak dilanti i nos mester wak kon nos por yuda drecha na loke ta pasando. Pa ami tambe e ta konta”, Nato a konta Djasabra.

Pa loke ta e aksidente el a bisa  e no ta kòrda e aksidente ei, e ta kòrda e tabata riba e motersaikel i despues na suela. E fase di e aksidente mes e no tin memoria mes di dje. E no sa ku ta outo a dal den dje òf no pero hende a bis’é di a mira den laira i despues na suela. El a haña preguntanan kon duru e tabata kore. “Mi ta un gai ku ta kore duru pero tin dia ku pa kasualidat bo no ta hasié i kosnan ta pasa. Pa ami e dia ei tabata un dia di hopi kasualidat”, asina Nato a sigui bisa. El a pasa i tin sierto kosnan ku mi ta kontentu ku entre otro mi tabatin entre otro un ‘veiligheidschoen’, mi hanskun i hèlm bistí. E hèlm semper mi tin i e hanskun ta despues di un fakansi na Merka el a bistié i a hasié kustumber aki. Si e no tabatin hanskun bistí e lo no tabatin niun dede mas na man robes. E hanskun a yuda pasobra e waya ku el a pasa aden a kòrta e hanskun so i no su dedenan. E ‘veiligheidschoen’ segun Nato el a yuda i e no a yuda. E tabatin plachi kaba den su pia i e plachi no tabat’ei mas despues di e aksidente di aña pasá. E ‘veiligheidschoen’ tabata será i pa Nato tin yen di milager ku a pasa den e aksidente aki.

Esaki ta un milager; Basta sla pero ta na bida....

Nato ta konta ku el a haña basta sla. El a kibra pia drechi i tin dos plachi den dje. E mester  a rekonstruí su pia robes pasobra el a plama kompleto. Su man robes e tin 4 plachi den dje i tur su dedenan el a kibra. E mobilidat kompleto di e man e no tin kompleto pero e ta konfia ku e lo bin bèk i e pia robes mester kaba di sera ainda. E ta na kas aktualmente den su rekuperashon i tin mas òf ménos un luna ku el a kuminsá kana bèk despues di tabata den rolstoel. E ruta di rekuperashon ta largu pero el a siña ku pasenshi ta gana gloria.

Vários aksidente, un mas grave ku otro...

El a bisa nos ku e tin sufisiente tempu ta kore motersaikel i no ta su promé aksidente. El a pasa den basta aksidente i tin mas chikí ku otro i mas grave ku otro pero den esun di aña pasá el a haña basta sla i e aksidente aki a sende yen di lus ku kisas e otro aksidentenan a pasa. “Mi ta hasié un ‘joke’ pasobra si mi bai sinta yora henter dia mi no ta keda kla ku nada. Mi tei, el a pasa i mi tin mi boka pa mi papia. Mi por ta yorando di doló paden pero si mi bai kansa bo ku mi dolónan e ta kansa abo mas ku abo ta haña ku bo ta pèrdè smak di tin kontakto ku hende ku ta hasi bu deprimí.”

Nato no ta nenga ku e ta kore motersaikel duru. El a bisa ku e tin ora ku e tin di haña e airu mas duru. Nato ta masha kouteloso ku ponementu di ‘fever’. E no ta kore skuer pero e ta mas den velosidat. E por bai Parera i palu blanku mara, e ta sera wowo i hasié pero gewon kue kaya sera i drei e no ta hasi. E ta gusta pusta no riba pista pero ta gusta si.

No tin lugá pa pusta....

Riba nos pregunta si e ta haña e kosnan ei responsabel pa hasi riba kaya Nato a kontestá ku e no tin kaminda pa hasi loke e ke hasi ke men ta unda a ked’é di a hasié.  Nato tin 41 aña i mas di 20 aña ta kore motersaikel i e ta kòrda ántes tabatin Koral Tabak pero ta kiko a sobra. E drèmpelnan mes ta stroba. No ta dushi pa bisa ku ta sera kaya pero kiko ta kosta pa hinka sèn den un deporte rekonosé mundialmente pe. Kòrsou ta rekonosé mundialmente pa ‘stunting’ di Bike i dikon no invertí den dje. Tin algun hóben ku si no hinka nada den nan, no ta haña nada di nan. Nato a sigui bisa ku e ta un motosiklista di kurason i no pa divershon so. Un hende ku nunka a kore no sa kiko e sentimentu di ta riba un motersaikel ta.

Kore motersaikel ta kita mi strès...

El a sigui bisa di ta sinti falta di korementu di su motersaikel. E tabata algu pe ku ta kita strès i ta algu masha dushi. Nato a bisa ku e no ta primintí niun hende ku e no ta subi motersaikel mas. For di ora bo hasi algu ku hòbi i  e ta parti di bo e ta difísil pa lag'é. Si bo dal tenchi den porta, bo ta kita henter e porta pasobra bo a dal bo tenchi den dje. Si bo bèk dal outo bo no ta stòp di kore outo pasó a dal. Nato a bisa ku el a traha motersaikel pero awor e motersaikel a pone e wòrdu trahá bèk. Apesar di tur e aksidentenan ku el a pasa aden nunka e lus a sende pa e stòp di kore motersaikel. E ta gradesí Dios si semper ku e ta keda bon i awor ku e ta bibu ta milager tras di milager. Hopi di e gainan ku e ta kore kuné ta bisé ku e tin mas bida ku un pushi.

Derechi preferensia...

Pa loke ta derechi di preferensia pa motosikletanan el a bisa e kos ei no ta eksistí na Kòrsou. Si ta 10 motersaikel huntu nan por haña preferensia. Si ta 2 ta mihó e komo motosiklista para na punta di hanchi i laga e outo bai. El a eksperensiá kore den eksterior i ta algu kompletamente otro di loke tin na Kòrsou. Un motersaikel for di ora tende por ehèmpel na Merka, ta tene kuenta ku nan. I pa un pais chikí manera Kòrsou tin aksidente di motosiklista tur siman i esei no por. Outomobilistanan ta balotá e velosidat di un motersaikel i segun Nato den tráfiko ta sea bo ta sali òf no i no por balotá un motersaikel. Un zonido di motersaikel no ta manera outo pasobra nan zonido ta haltu i ta atvertí e outo pa indiká ku nan ta biniendo i pa no sali. Meskos anochi mayoria di nan ta kore ku hazard, i nan no sa mas kiko nan mester hasi i pone pa tene kuenta ku nan preferensia. Kon ta konsientisá e hende ta un ‘struggle’ pa semper. Por konsientisá sierto hende pero ta keda na e hende mes pa realisá. Tin hopi outomobilista no tin famia ta kore motersaikel i nan no tin e kurason ei.

Mas di 400 firma...

Nato a bisa di lo no drecha e motersaikel ku el a kibra aña pasá mas. E tabata un motersaikel spesial pe. E tin mas di 400 firma riba su motosaikel. Ta firmanan di motosiklistanan di diferente pais. E motersaikel aki mester a duna honor na motosiklistanan na bida i no ora nan a bai kaba. Tin 3 pa 4 di e firmanan riba e motersaikel ta di motosiklistanan ku no tei mas. I kasi nada no a pasa e motersaikel mes den e aksidente. Ta djis su parti dilanti na su stürwil a haña tiki sla. I p'esei mirando kiko a pasa e ta puntra si ta bale la pena drech’é. Pero e tin un idea i e motersaikel mes lo no ta riba kaya mas. Kisas parti di dje si lo ta riba kaya. E motersaikel ei ta unu ku ta Nato a traha, adaptá.

Imaginá bu ku e motosiklistanan ei ta bo yu....

Na e outomobilistanan Nato a bisa pa nan djis imaginá ku nan yu ta biniendo riba un motersaikel i abo na punta di hanchi i bo Sali. Djis imaginá ku ta bo ser kerí ta riba e motersaikel ei. Ta abo mester sa ku bo ta dal e òf no. I na su koleganan motosiklistanan el a bisa ku nan tur sa di dje. Hèlm ta algu ku e ta bisti tur ora. E ta masha importante pasobra e ta skapa nos di hopi kos. E mes ta un ehèmpel di esei. E ta bei pasobra hèlm a yuda.