WILLEMSTAD.- Un famia komersiante ta den tristesa despues di a para mira nan negoshi kima ayera nochi.
Ta trata di Wah Sang minimarket di un famia chines situá na Hoenderberg.
Nèt na momentu ku e minimarket aki a sera den kareda di 10 or di anochi, personanan moviendo den e área a tuma nota di algu paresido na kandela parti paden di e negoshi. No a dura muchu ku e edifisio kompletu tabata na kandela.
Unidat di brantwer Rio Canario i tambe Steenrijk a bai na e sitio, pero na nan yegada no por a hasi muchu. E kandela tabata unu hopi grandi.
Riba imágennan por a tuma nota ku tabatin vários produkto tabata rementá miéntras por a sinti un kayente enorme pa basta meter for di unda e kandela tabata.
Polisnan mester a hala tur hende atras teniendo na kuenta e situashon di kosnan ta eksplotá i e grandura di e kandela.
EXTRA su reportero/fotógrafo ku a yega na e sitio asta promé ku brantwer a presentá momentu ku e famia tabata purba saka algun pertenensia for di negoshi.
Abitantenan di e kasnan den serkania tambe a kuminsá kore pa mira si nan tambe tin di saka kos for di nan kas, ya ku e edifisio di e minimarket ta mei mei di basta kas den e bario di Hoenderberg.
Miéntras e vlamnan tabata bai laira, e wayanan di koriente tabata chispa i bin abou. Diferente kas konsekuentemente a pèrdè koriente.
Bomberonan a hasi nan máksimo esfuerso pa a lo ménos dominá e vlamnan i evitá ku e kandela ta pega e otro kasnan den banda. No por a skapa nada di e minimarket. Te den oranan lat di awe mardugá bomberonan tabata pagando pida pida kandela.
Awor investigashon mester bai determiná kiko lo por a kousa e kandela aki.
