WILLEMSTAD – Konsiderando desaroyonan rondó di e subida di preis di komestibel, Minister Ruisandro Cijntje di Desaroyo Ekonómiko ta pone lus riba e plannan ku Gobièrnu a bin ta implementá den e último dos añanan pa atendé ku e situashon aki. Pa motibu di diferente faktor, preisnan di komestibel ta subiendo mundialmente i na Kòrsou inevitablemente nos ta sinti e efektonan di esaki.
Gobièrnu a premirá e diferente desafionan ku e subida di preis riba nivel internashonal ta trese kuné i a komprometé su mes den su akuerdo di gobernashon pa hasi e ehersisionan nesesario pa mitigá e efektonan riba e nivel di preis general. E maneho ta, pa garantisá stabilidat di preis òf purba manehá e kosto di bida i gastunan di hasi negoshi mas tantu posibel.
Kòrsou ta importá mas ku 90% di tur produkto pa konsumo i uso diario kual ta enserá ku Kòrsou ta dependé di importashon i desaroyonan eksterno ku ta praktikamente pafó di nos alkanse. Pa e motibu akí, ta masha difísil pa Gobièrnu baha preisnan komo ku e preisnan ta wòrdu determiná pafó di Kòrsou su forsa di influensia. Lokual si Kòrsou por influensiá, ta e gastunan interno ku ta forma parti di komponentenan di stipulashon di preis di kada produkto.
Minister Cijntje ta sumamente orguyoso di mira kon ehekushon di e plan ya menshoná pa ku kombustibel, alimentashon i produkshon lokal a bin ta haña forma, ta birando realidat i a kuminsá duna su frutanan ku e meta pa mitigá e subida di preis i asina eksonerá esnan mas debil den nos komunidat. E diferente inisiativanan ta pa e.o. garantisá stabilidat di preis i akseso na produktonan di promé nesesidat.
Ministerio di Desaroyo Ekonómiko (MEO) den estrecho koperashon ku stakeholders (otro ministerionan, sektor privá, etc.) ta ehekutando e siguiente inisiativanan di maneho:
Aplikashon pa publikashon di preis – Mi PÒTMÒNI
MEO a krea e aplikashon Mi PÒTMÒNI (https://mipotmoni.meo.cw/) kaminda ku e públiko en general por hasi komparashon di preis di diferente komestibel i otro produktonan di promé nesesidat i wak unda su lista di kompra ta salié mas kumbiniente. Nos a kuminsá ku primeramente supermerkadonan i den fase 2 lo sigui ku minimarketnan. MEO ta hasi esaki pa alsa e nivel di konkurensia bou di komersiantenan i konsientisashon di e konsumidó. Mas konkurensia por nifiká un posibel redukshon di e preisnan riba merkado lokal.
Makutu Básiko Smart Card
E Makutu Básiko Smart Card lo sirbi komo un karchi pa duna deskuento riba komestibel i otro produktonan di promé nesesidat na personanan di ménos rekurso. E deskuento ariba menshoná lo pone ku e grupo di enfoke di esnan di ménos rekurso lo por tin akseso na komestibelnan na un preis mas kompetitivo. MEO ta den kombersashon avansá ku sektor privá riba e inisiativa di maneho aki i e sektor ta di opinion ku e inisiativa en kuestion ta brinda sierto posibilidatnan.
Proyekto piloto di agrikultura
E meta di e proyekto akí ta pa redusí kosto di produkshon lokal i baha importashon di sierto fruta i berdura. Den estrecho kolaborashon ku Aqualectra i Ministerio di Salubridat Públiko Medioambiente i Naturalesa a kuminsá ku implementashon di e trayekto pa otorgá agrikultornan un tarifa di awa redusí pa irigashon. Banda di esaki, ta e intenshon pa bai traha riba e produkshon di asina yamá ‘grijswater’ pa medio di mashin di ‘reverse osmosis’ ku nan lo pone na sitionan stratégiko banda di e klùsternan agrario mas grandi. Ademas tin e proyekto di kultivá den zona franka, ku ta enserá un akuerdo tentativo ku MEO a yega na dje den estrecho kolaborashon ku CURINDE pa yega na preisnan atraktivo pa por hasi uso di instalashon i terenonan di CURINDE pa praktiká kultivo moderno. Esaki ta konta tantu pa e zona na Aeropuerto komo esun na Nieuwe Haven. Pa loke ta trata tereno pa agrikultura, MEO ta den proseso pa sondia e posibilidat pa yega na posibel kolaborashon ku Ministerio di Tráfiko, Transporte i Planifikashon Urbano pa fasilitá entrega di tereno pa agrikultura. Esaki ku e meta pa stimulá i alsa produkshon lokal, teniendo na kuenta ku tin hopi tereno ku ta destiná pa agrikultura pero ku na e momentunan aki no ta den uso. E intenshon ta pa purba hinka e terenonan menshoná mas lihé posibel den operashon. Finalmente, un di e opstákulonan mas grandi riba tereno di agrikultura ta pa atkerí personal kapasitá pa laborá den e sektor. Den kuadro di esaki, MEO a aserka Ministerio di Desaroyo Sosial, Labor i Bienestar pa ehekutá un ehersisio pa yega na kandidatonan ku lo por ehersé e labornan ariba menshoná. Pa por yuda futuro agrarionan lanta nan kompania òf esnan eksistente krese nan kompania, MEO huntu ku Qredits pronto lo lansa un fondo agrario kaminda na un interes di 2% e empresario por haña un fiansa máksimo di 100.000 florin.
