Minister Cooper a informa unda Kòrsou ta ku kategoria I

Presensia den konferensia di aviashon ICAO i FAA

WILLEMSTAD.-Kòrsou ta anfitrion di un konferensia riba seguridat di aviashon. Ministernan Charles Cooper (Aviashon) i Ruisandro Cijntje (Turismo i Ekonomia) tabata presentá na e apertura di e konferensia ku a tuma lugá den edifisio di PWFC. EXTRA a komprondé ku aparte di Curaçao Sivil Aviation Authority i Curaçao Airport Partners tei presente tambe funshonarionan di Federal Aviation Administration (FAA) i International Civil Aviation Organization (ICAO).

Den su palabranan na okashon di e apertura minister Cooper a bisa ku na momentu ku surgi un aksidente semper tin dos aspekto ku mester tene na konsiderashon. Na promé lugá sea ta trata di un fayo humano  di un òf mas hende òf ta trata di un situashon insigur ku a kondusí na e aksidente.

Pa loke ta trata aviashon ta asina ku Kòrsou ta dependé di un bon aviashon anto sigur. Konekshon global ta di sumo importante meskos ku turismo. P’esei ta imperativo pa garantisa seguridat den aviashon. Esaki  ta un kompromiso kompartí.

Minister Cooper a rekonose di funshonarionan di JetBlue tambe meskos ku ICAO i FAA. ‘Boso presensia na aki ta rekonfirmá e kompromiso di Kòrsou pa siña for di e mihónan implementando e mihó práktikanan di e industria. Kòrsou a demostrá dedikashon firme kombiná ku un aktitut proaktivo i solushonnan inovativo pa salbaguardiá tur hende.

Probechando e presensia di FAA den sala di PWFC minister Cooper a splika ku ta trahando duru na kambio di leinan i tambe buskando e personal nesesario ku e meta pa Kòrsou por logra yega Kategoria I bèk.

Promé kos ku e gobièrnu aktual a hasi ta pusha den Parlamento un lei ku ta permití pasaheronan paga un suma chikitu na aeropuerto ku ta forma algu mas ku 1 mion, anto esei ta e suma speshal ku ta keda destiná pa aviashon sivil. Awor tin un kompromiso di gobièrnu ku Aviashon Sivil tin e sèn pa kubri training di nivel haltu di e personal. E minister ta kere ku pa otro aña e leinan konserní ta den Parlamento i ta spera ku lo haña aprobashon pa asina Kòrsou por yega mas serka di logra Kategoria I atrobe.