WILLEMSTAD.- Minister di Salubridat, Medio Ambiente i Naturalesa den un karta dirigié na direktor di Bureau Telecommunicatie & Post sr. Curt Belfor ta pidi pa duna prioridat na e preparashonnan ku mester kondusí na investigashon independiente, pa loke ta trata kosto, investigashon di tarifa i un análisis di efektividat di tarifanan di remedi na Kòrsou. E karta na sr. Belfor ta fechá 16 di novèmber, ku ta djaweps último, nèt promé ku e asosiashon di botikario i doñonan di botika a bati bèl di ousilio.
Minister Cooper a firma e karta aki komo e mandatario interino den ousensia di su kolega Silvania. E karta ta splika ku e ministerio di GMN ta den konsulta ku e asosiashon i tambe SVB pa yega na posibel revishon di e kompensashon pa kada linja di resèpt (receptregelvergoeding).
Botikanan a presentá un proposishon di e botika modelo i minister ta di opinion ku e proposishon ei mester bira parti di e análisis di tarifanan. Hasiendo esaki lo por yega na mihó idea di e haltura di e receptregelvergoeding pa futuro.
A palabra ku CZA lo presentá un plan di trabou i pa despues lo presentá esaki na stakeholdrs, sinembargo esei no a tuma lugá ainda. E mandatario a hasi un apelashon pa dun’e prioridat pa mas tarda 24 di novèmber próksimo. EXTRA a publiká den edishon di awe mainta un komentario di e asosiashon di botikario i doñonan di botika den kua ta pidi atenshon di gobièrnu pa kaba.
