WILLEMSTAD.-Despues ku gobièrnu di Kòrsou a disidí ku ta paga empleadonan publiko indexering riba 2019 i 2020 na luna di desèmber 2023 i tambe posiblemente lo paga loontrede 2020 i e 3% di lumpsum 2020 na final di desèmber 2024, awor minister di finansa Javier Silvania den un karta na gerensia di fondo di penshun APC ta pidi pa hasi un análisis profundo i wak si no por paga penshonadonan di APC tambe indexering òf sikiera un suma fiho komo kompensashon.
Minister Silvania den un karta fechá 9 di novèmber dirigí na sra. Evelyn Kruithof-Bor ta mustra ku pa hopi aña kaba Kòrsou ta enfrentá situashonnan sosial ekonómiko hopi difísil i tur esaki ta kondusí na oumentu di inflashon miéntras forsa di kompra ta sigui baha.
Di su banda gabinete Pisas ta hasi tur esfuerso pa yuda hinter pueblo i spesialmente esnan ménos pudiente pa nan por sobrebibí den e situashon ekonómiko i sosial di e pais aki. Pa e penshonadonan e situashon ta hopi difísil i ta den e kuadro ei e minister ta pidi APC su gerensia pa hasi un análisis te kon leu por paga penshonadonan indexering. Teniendo kuenta ku si e grado di kobertura ta ménos ku 105% ta difísil pa paga indexering, e ta pidi APC pa studia alternativanan entre kua un pago di un bia komo kompensashon pa yuda e penshonadonan ku kaida di nan forsa di kompra.
Minister a indiká den e karta ku e ta pendiente kontesta di APC pa mas tarda 15 di novèmber próksimo.
