NEW YORK, AP.- Un muhé ku algun biaha tabata aspirante pa aktris a bisa ku Steven Seagal a viol’é den un fiesta despues di e filmashon di “One deadly ground”. E ta bisa ku e aktor a kita su paña i a ataké riba kama miéntras e tabata wak un foto di e kasa di Seagal riba e mesa pegá ku e kama.
Regina Simons a kalifiká e atake komo unu bestial, agresivo i troumatisante durante di un entrevista transmití djabièrnè den Megyn Kelly Today. E tabatin 18 aña e tempu ei.
E abogado di Seagal no a kontestá mesora e yamadanan buskando komentario. Simons a bisa ku el a keda strañá ku e tabata e úniko invitado na e fiesta di Seagal na 1993 pa selebrá e final di e filmashon, den kual el a traha komo ayudante.
“Promé ku mi a realisá ya e tabata riba mi i mi no por a move”, asina el a bisa. El a agregá ku el a sinti ku el a fris i ku no por a hasi nada.
Durante di e presunto atake Simons a bisa ku e ta kòrda di a mira un potrèt di Seagal i su kasá. E tempu ei Seagal tabata kasá ku Kelly LeBrock e strea di e pelíkula di 1985 Weird Science.
Tin mas muhé a akusá Seagal di violensia seksual, Jenny Mc Carthy a bisa ku e astro di sine di akshon a intimid’é seksualmente na 1995 durante di un oudishon miéntras ku Portia de Rossi a denunsiá Seagal di a habri su karson durante di e oudishon. E bosero di Seagal a nenga e akusashonnan di McCarthy na The Daily Beast. McCarthy a konta e mesun historia na Movieline na 1998.
