Museum on the go

Despues ku e pandemia di covid a kai aden, Museo di Mucha (kinder museum) a bin ku e idea pa nan mes bai kaminda e mucha ta i esei ta den skolnan sigur. Einan a nase ‘Museum on the go’ i a bira un proyekto gustando skolnan. Sugeidy Windster, progamming and Education a duna nos un “sneak peek” di ‘museum on the go’ i nos por  a eksperensiá esaki tambe na un di e skolnan. Sugeidy a konta Djasabra  Museum on the Go ta un inisiativa ku a lanta for di 2021, un tiki for di e nesesidat di e pandemia di covid i mirando ku skolnan tin hopi difikultat pa aserká nan i pa bin na e museo di mucha. E museo pa Mucha no ta esun ku hende ta pensa ku no por mishi òf ta mira kosnan kantu di muraya…esei no ta  e kaso serka nan pero Museo pa Mucha tin diferente kamber ku eksibishonnan spesial dediká na e desaroyo edukashonal di e mucha. Ora e mucha yega serka nan, e por mishi tur kos, e por hunga ku e kosnan ekshibí i esei ta yuda e motóriko fini i gròf i diferente aspekto den su desaroyo. Por mira ku tin hopi nesesidatnan pa esaki, e ta algu adishonal pasobra pa medio di hunga ta stimulá e mucha i e ta siña hopi mas di loke por kere. E parti hunga liber a ulandes ta un konsepto ku ta usa hopi e si e mucha no hasié e ta pèrdè hopi kos. Nan a ripará ku e bishitanan di skol a baha den temporada di covid. Esaki tabata un lástima. I p’esei nan a pensa si e muchanan no por bin serka nan na e museo, e museo lo bai serka e mucha. A aserká diferente partner i spònser i danki na entre otro Ennia, MCB, Cultuur Partisipatie i Actives Change ku por a trese e proyekto aki na bida i for di e eksibishon ku tin na museo di mucha a trèk nan i a hasi nan mobil. I p’esei e nòmber di Museum on the Go.

Museo serka e mucha

Sugeidy a splika ku nan ta bai ku loke nan tin komo eksposishon ku ta 5 total. Nan ta relatá na loke tin paden entre otro Bouwen, Vrij spelen kaminda e imaginashon di e mucha ta hunga un ròl importante i vários mas. E mucha tambe ta haña 2 diferente lès, pasobra Museo di Mucha ta para tambe pa arte ku ta masha importante pa desaroyo di e mucha i ku no tur ora ta haña chèns. Otro lès ta Stem, sience technology engeneering and map, kaminda e mucha ta haña chèns di eksplorá ku diferente kos di sensia, matemátika, engeneering, bouwen i konseptonan simpel di sensia ku ta duna e mucha.

85 klas

Museum on the Go segun Sugeidy Windster a bisa ku na e parti piloto tabatin 15 skol i a konsentrá na Bándabou. A hasi kasi tur skol na Bándabou asta skolnan spesial tambe a partisipá. Awor aki a bin pariba i mei mei i awor tin un total di 85 skol/klas ku Museum on the Go a pasa bishitá ku e eksibishon. Nan meta ta pa na final yega 125 klas. Nan grupo ku nan ta enfoká riba dje den e proyekto aki ta grupo 3, 4 i 5. E gruponan ei ta esnan ku ta sinta mas tantu pero nan tambe ta mucha, te ku sigur 12 aña bo tin e nesesidat i kuriosidat ku mester desaroyá. I p’esei e proyekto a permití pa konsentrá riba e gruponan di 3 pa 5. Sugeidy a bisa ku kisas den futuro lo por ofresé na grupo 6 i 7 tambe pero pa awor aki ta wante na gruponan 3, 4 i 5. E servisio aki ta grátis na skolnan danki na spònsernan. Despues di e ròndu aki lo mester pidi algun kompensashon chikitu pa konsientisá i pa asina por kubri sierto gastunan di e proyekto.

Bon akohida

E skolnan tabatin bon akohida pa e proyekto aki. Ora a bai serka nan, nan tabata kla habrí i kontentu ku e invitashon di Museo di mucha pa partisipá na e proyekto. Ora nan bai e skol ta haña e promé 2 lèsnan, despues nan ta bai den kurá di skol kaminda ta haña tur e eksibishonnan i e muchanan ta kana na diferente di nan. E mucha na e skol por hasi tur kos asta un ‘window washing’. Un mucha na kas bo ta pidié pa yuda ku algu e no gusta hasié pero tòg na skol e ta hasié ku mil amor. E ta laba bentana i hopi kos mas pa desaroyo di e mucha.

Edukadornan di trein

Museum on  the go ta konta ku edukadónan, ta trata di un grupo di dama ku nan a trein segun Sugeidy pa por trese e lès na e muchanan. Nan por para dilanti klas pasobra nan tin eksperensia di traha ku mucha di enseñansa di fundeshi i nan ta trese e lès di un manera mas interaktivo. Sugeidy a bisa ku ta enkurashá e dosente pa wak tur kos pasobra ta intenshon pa nan tuma over. I no ta asina asina a pensa riba e lès pero nan ta saka for di e áreanan di edukashon ku enseñansa  di fundeshi ta ofresé. For di e áreanan ei a saka sierto lès kaminda asta por duna punto na e muchanan. Sugeidy a bisa ku nan tin ideanan masha edukativo i inovativo i nan no ta usa nada karu. Hopi bia ta ku material resiklá nan ta hasi e lèsnan masha fásil. Esaki pa e dosente i skolnan no pensa ku nan no tin sèn pasobra Museo di Mucha a pensa den algu mas kumbiniente posibel. I tur e materialnan pa hasi e lèsnan por usa kosnan resiklá.

Material desaroyá di resiklahe

Pa loke ta e material Sugeidy a bisa ku nan tin un tim spesial ku a aserká tambe dosentenan pa yega na e lèsnan desaroyá. Por ehèmpel nan último lès desaroyá tabata di teater. Nan a ripará ku ora nan tabata bezig ku e proyektonan, e muchanan tòg ta sinta hopi ounke nan ta bezig ku arte òf sensia. I nan tabata ke pa e mucha move un tiki mas. I a pensa pa aserká un dosente ku ta duna arte den e kaso aki yùfrou Vanessa Werkhoven i el a traha e lès di teater, instruí e edukadornan di Museum on the Go pa kon nan tin si hasié, duna nan tepnan pa asina nan sa kon tin di involukrá e muchanan mas tantu prinsipalmente ora e mucha no ke partisipá. Ora e mucha partisipá na e lès bo ta mira henter un otro aspekto, e mucha ta bria. Mucha su fantasia ta enorme ku un tiki material desaroyá e mucha ta krea henter un historia. Einan e mucha ta haña chèns i ekspresá. Tin un tim di profeshonal ku a yuda desaroyá e lèsnan i esnan ku ta ehekutá e lèsnan tambe ta un tim profeshonal di trein pa museo di mucha.

Evaluá

Museo di Mucha a evaluá   e proyekto piloto ku nan a hasi pa responsabilisá na e spònsernan. For di e evaluashon a saka vários kos ku por  mehorá i asina nan a hasié tambe pa desaroyá sierto kosnan, implement’é pa e siguiente skolnan por a saka mas benefisio di dje. Por ehèmpel e tipo di lèsnan ku nan a pensa ta eksihí hopi tempu i e ta kita for di loke tin di dediká na e mucha. I einan nan a pensa pa trese balansa pa trese algu leuk i inovativo i ku no ta tuma hopi trabou. E métodonan moderno tambe nan ta implementá i ta tuma feedback di e yùfrounan ku a partisipá pa e kosnan pa tene kuenta kuné. Nan edukadornan di Museum on the go tambe semper ta duna feedback. Te ku awor nan a keda inová so pa e siguiente skol haña  e mihó.

Forma parti di skolnan

Te ku awor nan por sigui te kuminsamentu di e aña  eskolar nobo na sèptèmber pa por yega na 125 klas. Ora yeg’é segun Sugeidy nan ta hasi e evaluashon final pa duna responsabilidat kon a bai. E skolnan di nan parti a sigui pidi i nan no ke pa Museum on the Go para. Asta a pidi pa otro gruponan ku no a bini na remarke a inkluí nan tambe. Sugeidy tin speransa ku e por bai forma parti di e kuríkulo di skol. E lo tin gana di sinta na mesa ku e diferente direktivanan di skol pa asina  nan haña presentashon pa mira kiko ta e balor agregá di e proyekto aki i asina nan por mira kon e mucha su desaroyo ta bai dilanti ku e proyekto aki pa finalmente yega na algu mas duradero. E mucha ta bai over a siguiente klas i semper tin mucha nobo ta drenta. Si un bia pa aña un sierto skol haña chèns pa partisipá na e proyekto aki i si por yega na akuerdo ku e direktiva di skolnan, esei lo garantisá ku tur mucha na Kòrsou a bin na remarke pa e proyekto di Museum on the Go i a benefisiá di dje. Sugeidy ta kere ku si wak e benefishinan, e ta kere nan por yega na kontinuidat sigur di e proyekto aki. I ounke e gastunan ta haltu nan no ta deskurashá pa sigui, ta djis un tiki kolaborashon lo mester sea di mayor òf direktivanan di skol. Al final e ta na benefisio di futuro di e mucha. Si por lanta un generashon sano, ku ta lanta ku e sentimentu di por hasi su eskoho e mes di kon e ke yena su edukashon, lo ta algu grandi. I ta na un kaminda ku por laga e mucha tuma  e desishon ei pasobra e mucha por.

Hunga huntu

Inklusive Playground ta un proyekto nobo di Museo di Mucha. E ta netamente pa e mucha òf persona ku desabilidat huntu ku un persona ku no tin desabilidat i huntu nan ta hunga. Nan por hasi e hunga liber huntu pasobra te ainda a tene nan separá di otro. Si for di edat chikí a kustumbrá e mucha di wak  kiko ta normal, no ta haña problemanan den sosiedat despues ku manera pesterei.