Tamanna Khemani

Tamanna Khemani ta un hóben yu di Kòrsou, ku a bai skol na Kòrsou i despues a bai sigui su estudio na Merka, kaminda el a keda. E tin aktualmente 10 aña na Merka i ta den e mundu di invershon di startup. Aktualmente e ta “seed investor” na General Catalyst, un di e firmanan di venture kapital lider. Tamanna a nase i krese na Kòrsou i for di chikí ta eksponé na e mundu di empresario, sea ta negoshi chikí òf kreashon di un proyekto nobo. E ta kere ku su ambiente a forma su perspektiva. Tamanna a studia na UC Brooklyn, kaminda el a keda eksponé den diferente área ku relashoná ku empresario, for di “startup”, “venture capital”, te industria ku nunka bo a yega di tende di dje. Durante klas i su kuater aña komo studiante, el a logra drenta den e sektor i siña tur kos di ta un empresario.

Pa pone esaki den konteksto: UC Brooklyn ta na North California, serka di San Francisco, konsiderá komo e kapital mundial di “startup”, “venture capital” i empresario. Komo e skol tabata keda serka di San Francisco, Tamanna tabata tin e oportunidat pa pasa hopi tempu den e siudat, siña tokante di e ekosistema i sa kiko ta atraé hende di tur parti di mundu pa kuminsá kompanianan. Dies aña despues, hopi di e ideanan a bira nòmber grandi manera Stripe, Airbnb i DoorDash.

Di boluntario te na un karera

Un di su mentornan ta Michael Cyble, fundadó di e plataforma di streaming Twitch. E tabata traha na Y Combinator, un di e akseleradónan mas respetá na mundu, ku ta yuda mas o ménos 600 te 700 kompania pa aña. Básikamente, e ta un skol pa “startup”, un skol pa si bo ke bira un empresario. Na un evento na UC Brooklyn, Tamanna a tende Michael papia, i ei su inspirashon a kuminsá. El a sigui buska kontakto ku Michael te na momento ku el a risibí un oportunidat. Tamanna a kuminsá komo boluntario i eventualmente a bira e persona mas hóben ku a keda kontratá den historia di Y Combinator. El a drenta na 2020, presis promé ku pandemia a kuminsá. “Tabata un lugá inkreibel, karga ku hende inkreibel,” e ta bisa. “Mi a siña asina tantu, no solamente tokante invershon, pero tambe kon un organisashon kompletu por transformá su mes pa traha 100% virtual, i despues adaptá di nobo pa bai bèk na presensia personal, despues ku e pandemia a kaba.”

Un eksperensia eksitante

Resientemente, Tamanna a traha na General Catalyst, un organisashon ku ta manehá $33 bion di kapital. Manera un invershonista na etapa inisial (early startup investor), el a logra invertí entre $11 pa $12 mion di sèn di General Catalyst den kompanianan di YC. Tamanna ta deskribí e eksperensia eksitante: “E karera aki ta permití mi pa keda semper un studiante. Kada biaha ku mi drenta un kamber yená di empresario, mi ta drenta ku e mente di un studiante. Na un dia di demo di YC, mi a topa ku un hende ku tabata tin un pashon inmenso pa vegan ice cream, na momentu ku vegan ice cream no tabata popular. Na mesun evento, mi a topa ku otro fundadó ku tabata opseshoná ku konstruí un avion supersóniko.” Segun e: “Ora mi papia ku un fundadó ku tin un pashon asina grandi, mi ta siña for di nan, pasobra nan ta e eksperto. Nan a gasta kantidat di ora, minüt i respirashon den e proyekto ei.” E meta di e kompania di avion supersóniko ta pa hasi buelo rònt di mundu den ménos di 30 minüt, i na un preis aseptabel.

Pa Tamanna, inovashon no ta solamente eksitante, e ta personal. “Mi a nase den un famia di empresario. Negoshi ta den mi sanger, i e trabou aki ta duna mi e oportunidat pa tuma parti den forma e futuro.”

Oportunidat pa logra éksito

Tamanna ta bisa ku tin hopi kos ku el a siña. Kombinando su tempu na YC i GC, el a krea un lista  mental pa ora e topa ku un fundadó. E lista no ta mesun kos pa tur kompania, pero tin algun kualidat ku ta ripití den tur bon fundadó, no ta importá e tipo di invenshon. E lista no tin un órden spesífiko, pero mas tantu un fundadó tin, mas probabilidat nan tin pa logra éksito.

Un di e puntonan mas importante segun Tamanna ta “storytelling”, konta e historia. Un fundadó mester sa kon pa konta su historia bon. Paso asina nan ta lanta kapital for di invershonistanan, I por konvensé personanan talentoso pa laga un trabou sigur di 9-5 pa traha pa nan, sin gana hopi sèn, pero pa 40-60 ora pa siman den e komienso di e proyekto. “Storytelling” ta e manera pa krea visibilidat i gana konfiansa di klientenan.

Un otro punto esensial ta ekspertisio. E por manifestá den hopi forma: bo por ta un eksperto den e área di bo kompania, òf un eksperto den bo usuario paso bo mes ta un usuario i bo ta komprondé na rais di e problema ku bo ke solushoná. Mantené bo mes serka di bo klientenan ta mas importante ku hopi hende ta imaginá.

Mente habri, risibí sugerensia i mehora produkto

Segun Tamanna, ta vital pa deskubrí e “why” di un fundadó, kiko ta e motibu pa a kuminsá traha riba e idea aki, i pa bo dediká 20 aña di bo bida na dje. E dikon aki mester ta infinito, algu ku por tene bo motivá durante hopi tempu, paso e kaminda lo ta duru i yená di opstákulo.

Tambe ta importante pa tin un bon tim, un persona tékniko ku sa konstruí e produkto ku e kliente ta buska, un tim frontal, un tim patras, i un bon diseñadó.

Un otro kos ku ta uní tur esakinan segun Tamanna ta velosidat. El a mira fundadó hóben ku a kita for di skol, ku basta hende a duda si nan lo tin éksito, i tres aña despues nan ta den tòp di nan industria. Loke esaki ta bisa ta ku mester invertí den un tim talentoso ku ta move lihé, ku ora kliente duna sugerensia, nan ta ahustá i sigui move.

E ta mira fundadó ku ta kreá algu ku visiblemente no ta hopi bon, pero e ta traha efisiente pa e kliente, i e kliente ta paga pa e produkto aki, i e fundadó ta gana mion riba dje. Den kontraste, tin fundadó ku ta traha produkto pero no ta lansá nada. Si bo no lansá, bo no ta haña sugerensia pa mehorá. P’esei, Tamanna ta insistí ku ta krusial pa tin un mente habrí, risibí sugerensia, i hasi uso di dje pa sigui mehorá e produkto.

Hopi interes den hóbennan

Tamanna ta bisa ku tin hopi hóben interesá. E ta mira un interes ku ta krese entre hóbennan. Algun aña pasá, ora hende tabata bisa “hóben,” e tabata referí prinsipalmente na graduadonan di universidat. Pero awor, “hóben” hopi bia ta referí na graduadonan di skol sekundario òf na esnan ku ta den nan promé aña di universidat.

E ta splika ku ora e tabata na universidat, kapital di riesgo (venture capital) no tabata mirá komo algu emoshonante òf glamoroso. “E no tabata e kos briante ku tur hende kier hasi, prinsipalmente paso no tin un kaminda pa bo desaroyá bo konosementu pa drenta den e industria,” e ta bisa. “Ora bo kuminsá siña di dje, e no ta ‘sexy.’”

Awendia, e ta mira un kambio grandi. Mas i mas hende ke komprendé kon kapital di riesgo ta funshoná. Hopi tin ambishon pa traha den e mundu aki, sea komo invershonista o sea komo fundadó ku ta kreando e próksimo gran kompania.

AI ta e sektor mas hot

Tamanna ta un invershonista di “early-stage”, loke ta nifiká ku e ta pone atenshon riba kompania ku aún no tin ningun finansa òf ku ta buskando “pre-seed” òf “seed” kapital. Esaki ta normalmente kompania ku ta buskando entre $0 te mas o ménos $5 mion, paso despues di esei e finansiamentu ta bira hopi mas tékniko. “Na e nivel aki, tur kos ta tokante di e fundadó, e tim, e ambishon i e historia,” e ta bisa. “Invershon na e nivel aki ta básikamente ‘apostá’ riba hende. Bo ta topa un hende ku tin solamente un idea, bo ta skohe pa kere den nan, duna nan e rekurso ku nan mester, i un par di aña despues nan ta hasi esaki realidat.”

Awor mes, Tamanna ta mira hopi oportunidat den “AI startups”, spesialmente kaminda Inteligensia Artifisial ta kambia e industria na un ritmo hopi lihé. Despues di un dékada den e revolushon di AI, e ta nota ku esaki ta un di e sektor mas “hot” pa invertí. E menshoná tambe solushon di “ enterprise”, produktonan òf servisio ku bo por bende na negoshinan chikí, mediano òf grandi, sea pa benefisio di nan empleadonan òf di e operashon di negoshi mes.

Den su karera, el a invertí hopi den AI i “enterprise startups”, pero tambe e ta un gran fanátiko di salubridat i kompanianan basá riba konsumidó. Aunke e dos sektor aki por ta mas difísil, e ta haña ku trese hopi gratifikashon.

“Startups” pa konsumidó, e ta splika, ta difísil paso bo éksito ta dependé hopi riba distribushon i krea distribushon no ta kos fásil. “Konsiderá Snapchat, Instagram òf Facebook, tur e kompanianan aki ta basa riba konsumidó, i konstruí na manera korekto ta un den un mion.”

E sektor di salubridat tambe tin su desafionan úniko, spesialmente den U.S., kaminda fundadó mester nabegá un sistema kompliká i hopi biaha kibrá, miéntras ku nan mester gana e kurason i mente di hendenan den polítika. “Ta hopi difísil,” Tamanna ta bisa, “pero no imposibel. Tin fundadó ku a logra hasi esaki ku ekselensia.”

E kompania sorprendente

Tamanna ta menshoná un kompania ku el a invertí den dje, ku yama Finni Health. E fundadó, Bucky, ta un hóben ku su famia a imigrá pa Kánada. Su mama a kuminsá un klínika pa kuida mucha ku outismo ora ku Bucky tabata chikí. Kresiendo, su mama no tabata papia Ingles bon i mester a buska yudansa pa pone e klínika riba pia. Bucky a yuda su mama pa yena papel, firma dokumento, aprobashon i legislashon. Básikamente, el a pasa hopi parti di su hubentut yudando su mama hasi e trabou aki. Durante tempu, el a komprondé ku su mama, ku ta duna yudansa na mucha ku outismo, no por a pasa sufisientemente tempu ku e muchanan, paso e tabata okupá ku e parti di yena papel i ku hende ku no ta komprondé su trabou. E tabata gastando hopi tempu na kos ku no mester.

Pa e motibu aki, Bucky a uni ku su mihó amigu, ku ta un di e ingeniero di kòmpiuter mas talentoso i inteligente ku Tamanna konosé, nan a bai skol huntu. Huntu nan a forma un ekipo ideal. Bucky a dediká su promé 20 aña di bida pa revolushonando un industria ku normal ta trata ku poko importansia. Hopi di e klínikanan di outismo ta manehá pa kompanianan privá ku ta importá solamente riba e ganashi, nan no ta importá den proveedor ni di e muchanan.

Bucky i su amigu a krea Finni Health pa kambia e situashon. Tamanna a topa ku nan dos algun aña pasá, sin sa ku nan tabata fundadó di e organisashon I sin nan tabata sa ku e ta un invershonista. Ora Tamanna a deskubrí di nan historia, el a komprondé e dikon di e organisashon I e motivashon di Bucky ta personal, e ta pa su mama. Pensa ku bo tin 100% energia, pero solamente 50% ta bai pa yuda ku e mucha i e otro 50% ta bai na yena papel. Si su mama por haña e 50% aki di tempu, e por pasa mas tempu ku muchanan. Esaki a keda den Tamanna su kabes.

Un otro bentaha di Bucky ta ku el a move rápido. El a krea e ekipo korekto, el a konvensé su mihó amigu ku tabata tin un trabou ku ta paga hopi bon pa bin traha kuné, i den tres pa kuater aña despues e organisashon a bai hopi bon. Tamanna ta bisa ku el a asta invertí den nan ronda di Series A, ku ta mion di dòler, i nan a kambia e industria. Tamanna tin hopi speransa den nan.

Super poder

Siendo di Kòrsou, nos kier a sa di Tamanna  Kon e perspektiva global aki ta influensia e manera ku e ta evaluá fundadónan. “Mi ta kere ku esaki ta un super poder di mi”,  Tamanna a bisa. E ta splika ku riba isla nos ainda no tin Uber, pero nos a risibí Airbnb. “Ser di Kòrsou ta siña mi semper di unda mi bira, kon mi a krese, i kiko realmente ta importante. Mi a usa esaki komo un forsa spesial”.  “Mi  por konektá ku fundadó mas fásil. Kòrsou ta un isla hopi multikultural. Mi a krese rondiá di hende for di tur lugá ku tur tipo di fondo ku bo por imaginá. Mi ta kere ku esaki a transformá den un habilidat , mi ta por topa ku kualkier hende di kualkier parti di mundu i mesora nos ta konektá. Mi ta kere ku esaki ta pasa pa motibu di e naturalesa multikultural di nos isla”. Un otro punto importante ta komprondé ku Kòrsou ta den proseso di desaroyo, prinsipalmente na trese teknologia, startup i AI. E perspektiva aki yuda pa e balorá ku fundadónan for di for di Estados Unidos mester traha mil bia mas duru, no solamente pa bin na E.U., pero tambe pa keda i krea empresa.

“Esaki ta motibu pa mi ta sinti un privilegio traha ku fundadónan ku no ta di E.U. Mi no ta bisa ku mi tin mas rèspèt pa nan, pero mi tin un kantidat inkreibel di rèspèt pa tur esaki ku nan a superá. Pasobra mi mes ta di un isla chikí, mi ta komprondé kon hopi opstákulo mas nan tin ku kibra, pa yega na E.U. Por ehèmpel, na Kòrsou si tin blèkout o si e Wi-Fi no ta bon, òf ku e barera di idioma, hopi invershonista lo bisa ku e ta kos chikí. Pero pa nan ta kos grandi i ta hopi importante. Ora bo ta topa ku fundadó, bo mester sa di unda nan ta bini i kon hopi mas nan a tin ku lucha pa yega na e mesun lugá ku un fundadó di Amérika.
Por ehèmpel, Bucky ta di Kánada, ku ta banda di e Merka, pero nan no ta di e Merka. Hopi esfuerso i motivashon a keda invertí pa el bai Merka I tin éksito.

Mas kurashi pa skohe

Tamanna ta bisa ku tin hopi kos ku por  hasi pa Kòrsou, pero tur kos ta dependé di e gana i apetit di nos hendenan. El a topa ku algun fundadó for di Kòrsou ku a kontaktá e, aunke nan a topa, ainda ningun invershon a tuma lugá. E ta hopi emoshoná pa wak mas hende haña e kurashi i skohe pa krea algu di nan mes.

Tamanna ta splika ku nunka e no a sigui un kaminda tradishonal, inkluso su mayornan, no ta komprondé tur kos ku e ta hasi. Durante su kresementu, e no tabata tin un ambishon so, paso e kier a hasi tur kos. Den skol òf na universidat, su ambishon tabatin kambia hopi.

Su karera komo invershonista den etapa prinsipal a duna e, e oportunidat pa eksperensia diferente área, desde sektor difísil te konosé e eksperto tras di e invershon. E ta bisa: “Mi tin e deseo pa stimulá hende na Kòrsou ku tin e gana pa kreá nan propio kompania. Inovashon ta algu spesial i serka di mi kurason.”

Invershon den próksimo 5 aña

“Tin hopi kosnan ku lo kambia den invershon den “early-stage” den e próksimo 5 aña,” Tamanna ta bisa. “Ora mi a kuminsá, hopi fundadó tabata enfoká na haña invershon for di “venture capitalist”. Pero awor, ku e boom di AI, e aktividat di invershon a kambia hopi.

Tin hopi kompania ku tabata hopi bon den e merkado promé ku e boom di AI, pero e boom di AI ta manera e kambio for di usa un telefòn ku kabel i usa Internèt. Ántes bo por a usa solamente unu, pero awor bo por usa tur dos i mas otro aparato elektróniko pareu. E mesun kos lo pasa ku AI awor pa dilanti. Nos lo por spera oumento di invershon.”

Optimista

“Despues di kada tempu bo ta topa un fundadó ku ta keda den bo mente, ku bo no por stòp di pensa riba dje. Tur fundadó i kreador tin fe den algu ku no ta eksistí ainda. I nan tin fe den nan mes. Ora bo ta topa un fundadó, aunke bo ta mira tur kos ta bai malu, nan tin inspirashon, pashon, i esaki ta e kosnan ku realmente ta importante.” Esaki ta loke ta tene Tamanna semper optimista.

Konseho na e próksimo generashon

Tamanna ta haña ku ta hopi importante pa no pone limitashon riba bo mes. E ta splika ku hopi bia nos ta pone límite riba nos mes pa motibu di nos orígen, kultura òf sosiedat. For di ora ku bo nase, tin hopi ekspektativa di kiko bo mester hasi i logra. Ta importante pa mira den bo mes i pensa kiko realmente bo ke hasi. Tamanna ta rekordá ku ora e kier a bai traha na “Y Combinator”, tur hende a bisa e ku e no por. Tambe e ta kòrda ku despues ku el a gradua, el a skibi un karta pa 500 invershonista, puntrando kiko nan ta hasi den nan bida diario, i hopi a bisa “Mi no ta kere ku e industria aki ta pa bo.” Si el skucha nan, e no lo a logra loke e ta hasi awor aki, kual ta un ”early stage investor”.

E ta bisa, “Ora mi a disidí ku mi ke traha na YC, mi no a pensa ‘Mi ta bai Mars i esaki ta imposibel paso ningun hende no a kere ku mi por.’ Mi simplemente a bisa, ‘Wak mi’ i mi a hasi esaki.” Esaki a pasa paso Tamanna no a pone ningun limitashon riba su kaminda. Si e lo a skucha hende òf kere nan, nada lo no a tuma lugá. E ta bisa ku e úniko hende ku tin e poder pa pone limitashon riba bo ta bo mes. Ningun otro, apsolutamente ningun otro hende.

Su mes kompania

Pa aki 5 pa 10 aña Tamanna ta bisa ku definitivamente e ta mira su ku un kompania propio. Na e momentu aki, e no ta sigur kua sektor e lo ke sigui aden, pero e sa ku e lo krea algu grandi. E ta emoshoná pa konektá ku mas fundadó i kreador, i ta spera di por bira un di nan. Manera e ta bisa: “Mi ke krea un kos ku ta di mi mes.”

Ta algu spesial pa mira un yu di Kòrsou hasi algu ekstraordinario for di pais. Tin hopi mas yu di tera ku ta aselerá internashonalmente i ku nos no ta na altura di dje Ta un satisfakshon i orguyo pa mira nos mes hendenan profilá.