Renata Sandriman (director Assurance)

Junice Augusta (manager advisory)

SOAB (Stichting Overheidsaccountant Bureau)

Dia 3 di òktober último SOAB a selebrá ofisialmente 30 aña di eksistensia. Pero e selebrashon ta tuma lugá henter luna di òktober i un di nan sigur ta pa laga komunidat serka konosí un tiki mas ku nan trabounan. I ta den e kuadro aki nos di Djasabra a papia ku Renata Sandriman Director Assurance i Junice Augusta Manager Advisory.

Un partner konfiabel

Kiko ta loke a hasi SOAB un instansia konfiabel den komunidat, den 30 aña di eksistensia. Renata i Junice a splika dikon por konfia riba SOAB. SOAB pa lei ta konsehero i sostenedó di gobièrnu den loke ta trata akountent. I no solamente pa loke ta trata aspektonan finansiero pero tambe organisatorio. SOAB semper a traha profeshonal, nan a mantené nan mes na nan liña profeshonal i ta afiliá na e parti di kalidat di kontròl di Hulanda. Nan a hasi nan trabou semper ophetivo i independiente.  E den kuadro di e profeshonalidat aki, ta importante pa nan keda balorá profeshonalmente tambe i loke ta sòru pa kresementu di e konfiansa serka e diferente gobièrnunan ku nan a konosé durante di 30 aña di eksistensia (ku por sierto tabata bastante un par). I kada bes ku otro gobièrnu nan tin di traha bèk na e lasonan i no solamente na Kòrsou pero tambe na St. Maarten i promé ku 10 10 10 e tabata konta pa henter Antia. Ta danki na e profeshonalidat di e trahadónan/kolaboradónan di SOAB nan a yega kaminda nan ta awe, segun Renata a konta nos. Junice di su parti a trese dilanti ku e mes a traha promé den e sektor gubernamental, i despues a pasa over pa SOAB i por ripará ku ta hinka hopi sèn i energia na edukashon di e personal. Konstantemente e personal ta den trayekto di siña kos nobo i esei ta yuda na loke por ofresé na e ministerionan ta e kosnan di mas nobo ku tin. Esei tambe ta engrandesé e konfiansa.

Independiente pa gobièrnu

SOAB ta un fundashon independiente i internashonalmente e ta kai denter di gobièrnu. Nan ta den forma di un fundashon ku ta dun'é e derechi privá i funshonalmente nan ta kai bou di e ministerio di finansa ya ku hopi bia e tin di aber ku e parti finansiero. Esaki sinembargo no ta nifiká ku nan tin di solamente traha pa e ministerio di finansa pero nan ta hasi trabou pa gobièrnu kompleto. I banda di esaki tambe nan ta duna servisio na instansianan relatá na gobièrnu.

Ta hala atras si ta trata di un famia/konosí

SOAB ta hasi su trabou di forma independiente. Kon fásil esaki ta bai Renata i Junice a duna un splikashon. Fásil e no ta pero no imposibel. Tur kos ta dependé di e “mind set” bo ta pone su tras. I p’esei nan hendenan ta profeshonalnan ku ta traha di forma profeshonal. Kòrsou ta un isla chikí i semper bo tin relashon ku un ke otro persona. Nan ta tene kuenta semper den kualke enkargo ku nan haña di e posibel relashon ku esun ku ta duna enkargo i esun ku ta ehekutá esaki. I p’esei serka nan na SOAB, un biaha mas for di e punto di bista profeshonal i independiente e lider di tim ku tin di hasi e trabou ta hala atras si ta traha kisas di un famia òf konosí, i asina nan ta kuida e resultado di e trabou. Den e trabounan ku nan ta hasi nan ta hasi uso di diferente hèrmènt ku ta yuda evitá e tipo di situashonnan ei. I nan ta poné den nan rapòrt tambe, na momentu ku e persona no ta tuma parti na e investigashon teniendo na kuenta su relashon. E sistema di kalidat di SOAB ta dirigí di tal forma ku ora e rapòrt ta kla no ta sin mas ta sak’é. Ta bin un investigashon mas aleu ku ta bai analisá e ‘dosier’ pa mira si e trabou a keda bon hasí. Na fin di aña tambe nan ta bolbe hasi un “compliance toets” pa mira si tur kos a kana manera mester tabata. I un bia kada kuater aña ta bin un tipo di “toets” asina tambe for di Hulanda di forma independiente pa mira si nan ta hasiendo nan trabou manera mester ta i ta kumpli ku e standart profeshonal. Na momentu ku nan tuma un trabou i promé ku hasi e trabou, esnan ku ta bai hasi e trabou tin di yena un formulario si e tin mag di hasi e trabou. Tin bia ora kontestá e preguntanan, nan mes ta bin ripará ku nan/esun konserní no por hasi e trabou ei pasobra e por trese bu finalmente den problema i asina bo ta hala atras.

Mas trabou i otro

Tirando un bista bèk den 30 aña di eksistensia Renata i Junice a splika ku e trabounan a subi hopi. Pero no solamente mas pero tambe otro. SOAB a krese komo organisashon i por hasi mas. Antes tabata un grupo chikí di profeshonal pero nan a krese. I mas konfiansa tin mas e demanda ta krese. I e parti di konseho/kontròl a krese drástikamente. Pero di parti di gobièrnu, e ministerionan tiki tiki a mira e balor di SOAB. Junice a bisa ku tempu e tabata den gobièrnu no tabata sa masha di SOAB pero dor di krese i dor di duna informashon e ministerionan sa unda nan ta. E kaminda pa aserká SOAB a bira mas grandi i pa diferente kos ta pidi yudansa. E parti di ‘acountency’ ta un mester i e parti di sosten pa un ke otro proyekto ta kresiendo mas i mas. Sosten pa maneho i sosten riba otro tereno ta birando mas i mas grandi.

Konseho pidí òf no

SOAB ta keda aserká pero tambe nan mes por sali i buska trabou. Renata a bisa ku pa lei nan tin posibilidat di duna konseho pidí òf no pidí. Pa lei nan por yega na tur atministrashon di pais i niun hende por para esei. Por haña ku denter di ministerio ta señalá algu i ta pidi pa konseho riba esaki.

Digitalisashon ta trese mas efisiensia

E retonan riba e tereno spesífiko di SOAB ta grandi. Nos ta papia aki mas riba e retonan di e transformashon digital. Ta un desaroyo grandi e AI. Loke digitalisashon ta trese pa nan ta efisiensia. Tin hende ta bisa ku pronto akountentnan no mester eksistí mas pasobra AI ta tuma over. Renata no ta kere ku esaki lo ta e kaso. E lo kambia pero mester di nan. Den nan audit nan ta hasi uso di AI. E digitalisashon ta yuda nan traha mas efisiente pero no ta hasi ku no mester di nan trabou mas. Junice a splika riba e punto aki ku e digitalisashon ta hasi nan efisiente sigur pero tin kosnan ku ta hende tin di hasi i keda hasi. Tin trabounan ku digitalmente por tuma lugá pero e parti di kontròl di e hende mester keda riba dje. Digitalisashon sinembargo ta yuda nan ku trabounan ku por bai mas lihé i mas efektivo i ku nan por keda eksplorá i hasi uso di nan mas tantu posibel. Junice tambe a bisa ku si nan ripará ku tin sierto hèrmèntnan ku por yuda sierto ministerio, nan ta trese esakinan mas serka di esakinan. Esaki pasobra no tur ora e ministerionan tin e fasilidat ni entrada pa yega mas serka di medionan ei i SOAB ta yuda den esaki. I meskos ku pa loke ta nan personal, nan ta wòrdu di train tantu den kas mes òf ta buska hende pa bin duna training. SOAB tin su presupuesto di edukashon pa e por sigui forma su mes i kapasitá su mes i e mes por skohe kua direkshon e ke desaroyá su mes. Un biaha mas pa por sigui kana ku e desaroyonan riba tereno di digitalisashon i kambionan riba tereno di Artificial Intelligence (AI).

Sosialmente envolví

SOAB ta hasi hopi proyekto tambe pa komunidat. Junice a bisa ku for di tempu e ta einan ku ta mas di 10 aña i promé kuné Renata tambe taba’tei, nan tin proyektonan hasiendo na komunidat. Nan tin diferente proyekto sosial entre otronan ta tuma parti na CuraDoet aki na Kòrsou i na St. Maarten. Temporada di covid nan a yuda ministerionan pa e personanan ku kier  a kuminsá nan negoshi. Tambe torneo Hope i e sèn generá ta bai pa un ke otro instansia manera bùs pa skol. Kada bes segun Junice nan a buska kiko ta pas na e momentu ei pa yuda den komunidat. I e aña aki den kuadro di nan 30 aña di eksistensia segun Renata, nan a kuminsá ku un trayekto di kursonan i konosementu dirigí riba entre otro finansa. Cyber Security diferente desaroyo. I esaki nan a hasi pa instansianan ku tin di aber ku gobièrnu i sierto grupo sosial.

Indispensabel

Despues di 30 aña di eksistensia, ya no por mira komunidat (Kòrsou i St. Maarten) sin SOAB. Ta un instituto di kontròl ku tin mester komo pilar den komunidat pa sòru pa e konfiansa den gobièrnu huntu ku Kontraloria General. El a bisa algu indispensabel!