Ora tende e nòmber di sikiater, hopi ta afili’é ku hende loko. Pero problema mental no ta nifiká hende loko. Problema mental ta un área hopi grandi. David Vinkers tin su konsultorio na Rotterdam Zùit i e ta bin hopi den kontakto ku antianonan/yunan di Kòrsou ku ta konfrontá problema ora nan yega e pais ei. Antianonan pa hopi aña  tin un sobre representashon den e statistiknan di kriminalidat. Tin diferente faktor a hunga un ròl den esaki, sosio ekonómiko, kultural, relashon ku Ulanda. Lamentablemente den último añanan masha poko interes transkultural tabatin i no a atendé bon ku esaki. Esaki no ta un lástima so pa e grupo spesífiko, pero tambe pa e kuido forensiko engeneral. Teniendo na kuenta e situashon ekonómiko negativo na Kòrsou, ta spera ku den próksimo añanan ku tin mas imigrante antiano lo bai rumbo Ulanda i ku lo por kai den kriminalidat.

David tin 16 aña komo sikiater. Siendo un ulandes, e ta kasá ku yu di Kòrsou i te dominá e papiamentu bon. Esaki ta masha importante pe, teniendo na kuenta e grupo ku mas e ta dirigí riba dje, esta e yu di Kòrsou. David a traha na Kòrsou 20 aña pasá. I den e kuadro aki e ta masha pega ku yu di Kòrsou.

Antiano den kriminalidat....

E ta sikiater pero tambe ta traha den prisòn i ta sikiater forensiko na Ulanda. E ta bin hopi den kontakto ku e yunan di Kòrsou ku ta yega Ulanda i ta kai sera ku mayoria biaha droga. E ta un problema hopi grandi. Ora wak e sifranan di último 25 aña por mira kon haltu e kontakto ta di antianonan ku ta bai for di Kòrsou. I ora kompar'é ku e kriminalidat na Kòrsou por wak e diferensia grandi. Ta un problema ku e ta hopi interesá den dje i e ta purba pa e hendenan ku e ta traha ku nan pa mira dikon e sifra ta asina altu. Ta dikon tin tantu ta kai sera. Hopi ku yega Ulanda ta kai sera ku droga teniendo na kuenta ku ta Kòrsou ta un lugá ku e droga ta yega pa sigui. E kriminalidat na Kòrsou ta nada di kompará ku e sifra di kriminalidat di antianonan na Ulanda. Ta un diferensia hopi grandi.

Un komunidat diferente.....

Ta kiko ta pasa ora e hende ta bai Ulanda, kiko ta sosodé. Kisas esaki ta algu sosial pasobra e komunidat na Kòrsou ta diferente ku esun na Ulanda. Ulanda ta un komunidat diferente i den e kuadro aki e proverbio “kansarm op de antillen, kansloos in Nederland”. Por mira hopi bia e problemanan ta kuminsá for di na Kòrsou. Pubertat, pobresa, problema ku skol, drop outs, no tin trabou, problema na kas i e hende ta disidí di bai buska un mihó futuro na Ulanda. Hopi bia esaki no ta un bon idea pasobra e por bai hopi lihé e kaminda robes. Ta bin aserka ku e ulandes tambe ta defisiente serka hopi. Ta difísil esun ku ni por papia ulandes bon bon pa integrá den e komunidat ulandes.

https://youtu.be/MFEEbp-bB6o

E ulandes no ta gusta mi....

Otro problema ku David a menshoná ta ku e hende di Kòrsou ta sinti ku na Ulanda e ulandes no ta gust’é i ta sintié deskriminá. Esei tambe no ta yuda na e kousa. David ta kere ku ta importante pa yuda e hende for di na Kòrsou promé e bai Ulanda. Nos ta den reino, Kòrsou ta forma parti di reino i ta importante pa Ulanda yuda drecha e situashon. Ekonómikamente kos no ta bai bon na Kòrsou i e situashon aktual ta mesun ku ta 1986 ora Shell a bai. E situashon awor ta asta pió. I por mira e último 2 aña hopi hende ta move di Kòrsou pa Ulanda. David a menshoná un sifra di 3 mil hende di Kòrsou ku ta bai Ulanda i hopi hende di e grupo aki ta kai for di e boto i nan ta forma un grupo di rísiko pa bin den kontakto ku hustisia. E kriminalidat serka antianonan ta keda haltu. Kòrsou ta un otro komunidat i kisas debí na e komunidat chikí ta sòru pa e hende no bai den e direkshon robes. Pero na Ulanda e situashon ta kambia.

Mas problema.....

David Vinkers a bisa ku banda di e yu di Kòrsou ku ta kai ku droga, nan ta topa tambe hendenan ku problema ku nan yu, problema finansiero, lugá di biba. E problemanan ta hopi. Na Kòrsou ta diferente. Na Kòrsou ta yuda e famia pero na Ulanda no tin e situashon ei pasobra na Ulanda kada ken ta riba su mes.

Ora e hende ku problema yega serka nan, e hende ta pensa ku e por bai Kòrsou bek pero tòg no ke bai bèk pasobra  e kos ta malu aki kaba. No ta un solushon pa bai bèk pero tòg wak kon kor por drecha na un manera bon. Nan ke pa e relashon di famia keda solushoná, pero ora e hende bai serka nan nan ke yudansa, i nan ta kana e kaminda pa yuda e hende segun David. Pero si e hende ta den prisòn, ta bira poko difísil pa yud’é i ta difísil pa por buska un trabou pa e hende.

Den su área di trabou David Vinkers a splika ku adikshon di droga ta un problema hopi grandi., Ta bin aserka ku tambe hende no ta gusta su mes, no tin disiplina pa purba di kambia nan bida. Esaki ta problemanan forensikamente sikiátriko hopi grandi. I e hendenan ei a keda semper bai den e mesun tipo di problema.

Aserká sikiater ta difísil.....

Pa aserká un sikiater ta difísil pasobra tin hende ta pensa ku ta hende loko so ta bai un sikiater. Esei no ta asina segun David pasobra sikiater ta un área di trabou grandi. Ora bo tin di bai un klínika sikiátriko ta diferente ku bai un sikiater na ofisina. I ta bon pa bai un sikiater promé e problemanan bira mas grandi.

Prepará bon....

Pa esnan ku ainda ku ke bai Hulanda lo siguiente; prepará bo mes bon, purba wak i tuma kontakto ku hendenan ku ta na Ulanda kaba, wak bon na Kòrsou unda por keda biba òf traha na Ulanda pasobra ora bo yega Ulanda, abo ta bo so. Bo tin di traha duru pa biba i pensa bon kiko bo ke. Prepará bo mes tambe bon pa e temporada friu na Ulanda.