WILLEMSTAD.- Koninklijke Horeca Nederland departamento Kòrsou (KHN Kòrsou) ayera a organisá un bríndis pa e aña nobo. E bríndis, ku tabata hopi bon bishitá, a tuma lugá na Blue Bay. Marieke van Hamond, presidente nobo di KHN Kòrsou, a duna un spich. Den e spich el a menshoná ku horeca na Kòrsou ta ofresé empleo na míles di hende, for di kokí i kamarera te trahadó di hotèl i personal di bar. E sektor ta duna un aportashon importante na komunidat lokal i ekonomia.
Segun Van Hamond den e último aña, hasi negoshi den horeca riba e isla no tabata semper fásil. “Pensa riba e konsekuensianan di e pandemia ku nos ainda ta sintí, e subida di preisnan di kompra, kosto di energia i hür, pero tambe e falta di personal. E falta di bon trahadónan den horeka a kondusí na stòp parsial òf stòp kompleto di diferente hotèlnan, restorant, bar i beachclub, poniendo e nivel di servisio den nos sektor na riesgo.”
Meta di KHN Kòrsou pa 2024 ta pa sigurá ku hasi negoshi den horeca no solamente ta agradabel, pero tambe ta wòrdu rekonosé atrobe.
Nos ta pidi gobièrnu entre otro pa:
-Desaroyá un polítika pa ekspanshon di forsa laboral. Nos mester por lo ménos 10.000 trahadó pa mantené ekonomia di Kòrsou traha, i e forsa laboral aktual ta keda atrasá.
-Revisá e polítika di inmigrashon pa yuda empleadonan estranhero den horeca komo solushon pa e falta di personal.
-Kontribuí na invershonnan pa kondishonnan di trabou i reglanan di nos sektor.
Relashoná ku e meta di KHN Kòrsou mes Van Hamond a bisa ku “den 2024 nos ta enfoká riba un kresementu den kantidat di miembro, mas entrenamentu i seshonnan di pensamentu pa empresarionan di horeca i ofresé mas benefishinan pa miembronan. Tambe nos ta trahando pa redukshon di e karga haltu di trabou i stress den sektor di horeca i nos ke invertí den edukashon i formashon pa trahadónan di horeca. Ademas, nos ta enfoká riba mehorashon di kondishonnan di trabou den horeca, inkluyendo formalisashon di reglanan di penshun.”
