LOS ANGELES, AP.- Por lo ménos ocho persona a muri i vários kas a wòrdu destrosá djamars despues di un áwaseru fuerte ku a provoká deslavenan den serunan ku a keda sin ningun mata debí na un kandela di mondi ku a asotá sur California luna pasá.
E ekiponan di reskate a usa helikòpternan pa trasladá personanan pa zonanan sigur paso e kareteranan tabata blòkiá. Bomberonan a yega pa un zona kaminda e lodo tabata yega te na sintura di esakinan pa reskatá un mucha di 14 aña di edat den un kas na Montecito, na nortwèst di Los Angeles. E tabata pegá akiden pa vários ora.
E ocho mortonan a pasa den lokalidat di Montecito, ku un poblashon di 9.000 persona den nortwèst di Los Angeles. Asina e bosero di kondado Santa Barbara, David Villalobos a indiká.
Vários kas a keda destruí i algun residente tabata pèrdí den besindarionan di akseso difísil debí na e kaida di palunan di lus i palu di mata, segun e kapitan Dave Zaniboni, di Departamento di Bombero di kondado di Santa Barbara.
Potrètnan publiká riba retnan sosial a mustra algun outo di bòltu riba kamindanan i e nivel di lodo ku tabata yega na sintura.
Meteorólogonan a indiká ku e kantidat máksimo di áwaseru a wòrdu registrá 3:30 serka di Montecito, Summerland i Carpinteria i a dura 15 minüt. Montecito a haña mas di 1,2 centimeter di awa den sinku minüt, miéntras Carpintera a haña 2,1 centimeter den 15 minüt.
