Polis di AT a kontesta tiru di sospechoso
WILLEMSTAD.-Dia 5 di yüli 2023 a aktivá Tim di aresto Kòrsou (AT) pa detené un sospechoso di un echo kastigabel serio na Kaya Meteorológiko. Promé ku por a detené e sospechoso, el a lòs algun tiru dirigí riba AT. Mesora, AT a tira bèk riba e sospechoso ku a keda heridá. Na momentu ku un agente di polis ta involukrá den un insidente kaminda tabata tin tiramentu ku leshon, Landsrecherche Kòrsou mesora ta inisiá un investigashon bou di direkshon di Ministerio Públiko. E insidente aki tambe a keda investigá dor di Landsrecherche Kòrsou. For di e investigashon a resultá ku AT a aktua konforme instrukshon ofisial. Esaki ta nifiká ku a sera e investigashon. Ministerio Públiko ta para pa un Kòrsou seif i hustu. Kuerpo polisial ta hunga un ròl importante den mantenshon di órden públiko i seguridat di e isla i su abitantenan. Pa e motibu aki, Ministerio Públiko ta husga aktuashon di agentenan polisial semper ku hopi koutela, sigur ora ta hasi uso di e monopolio di violensia. Landsrecherche ta un órgano investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel ku gravemente ta afektá e integridat di e atministrashon di hustisia i e integridat di e atministrashon públiko.
