MCB ta tuma distansia di 25 mion florin
WILLEMSTAD.- Ministerio Publiko (OM) a anunsiá awe ku a yega na un akuerdo ku Maduro & Curiel’s Bank ku MCB ta tuma distansia di e entrada ku a generá ku e asina yama klientenan ku ta swaip dòler. Ta trata di un suma di 25 mion florin florin ku a generá den e periodo di 2007 – 2015 na Kòrsou. OM no ta bai persiguí MCB pa e ròl ku e banko a hunga den e swaipmentu di dòler aki.
E investigashon Breton a tuma lugá bou di direkshon di OM i a keda ehekutá pa RST ku sosten di Combiteam FIOD/Polis di Hulanda. Breton ta enserá primordialmente si banko MCB 10 aña pasa a tuma sufisiente medida pa evitá òf prevení ku su klientenan ta partisipá na e práktika ilegal di swaip dòler.
E base pa e kaso ta e investigashon den e kasonan ku a haña komo nòmber Cymbal na Hulanda i Troja na Kòrsou. Ta asina ku venezolanonan tabata yega Kòrsou i ta hasi kompra na gran eskala hasiendo uso di nan tarhetanan di krédito, pero e realidat ta ku nan no ta kumpra nada i na su lugá nan ta haña dòler merikano kèsh. E dòlernan kèsh aki e venezolanonan tabata hasi negoshi ilegal ku nan riba merkado pretu na Venezuela.
Di e forma aki a hasi vários mion transakshon ilegal entre 2007 i 2015 ku tarhetanan di krédito venezolano. E práktikanan aki a kondusí na hopi falsifikashon den atministrashon di kompanianan. Den kaso di MCB a bira konosí ku algun di nan klientenan lokal tambe tabata aktivo den e práktika di swaip pa dòler.
OM a konstatá ku MCB no a kumpli korektamente ku su ròl di ‘watchdog’. For di 2012 e banko a adaptá su maneho di compliance di tal forma ku nan por kumpli mihó ku nan tarea. Mantenshon di e ròl ei ta importante pa integridat di e sektor finansiero.
MCB ta distansiá su mes di e entrada ku a generá e tempu aya. OM ta konsiderá e echo ku MCB ta tuma distansia di e suma komo un manera apropiá pa atendé ku e asuntu aki konsiderando seriedat i gravedat di e kaso. Di otro banda OM a tende kuenta ku ya kaba ta dies aña pasa ku e kaso a tuma lugá i MCB a koperá hopi bon ku e investigashon i na mes momentu a tuma medidanan esenario pa koregí e situashon.
