OM ta instruí polis pa apliká 0-toleransia den karnaval

WILLEMSTAD.-Aktornan importante den kadena hudisial ta kla pa sirbi komunidat durante di marchanan di karnaval ku ta na kaminda. Aktua robes sintié un bes e aña aki lo ta na vigor, asina minister di hustisia sr. Hato huntu ku fiskal di ministerio publiko i Kuerpo Polisial a duna di konosé durante di un relato di dia.

Minister Hato a splika ku gobièrnu ke garantisa ku tur kos lo kana na òrdu durante e fiesta kultural di mas grandi di e pais aki. Lo tin konsentrashon di hende i vehíkulo den un periodo kòrtiku, den un área spesífiko. E mayoria di hende ta komportá pero semper tin situashonnan kaminda outoridat mester aktua.

Fiskal Dennaoui a splika ku Ministerio Publiko ta duna instrukshon na Kuerpo Polisial pa apliká 0-Toleransia durante e temporada di karnaval. Ta nifiká ku OM ta tuma desishon mesora ku polis aktua, detené un persona i hib’e warda. E sospechoso por skohe pa paga e but mesora i haña 15% deskuento òf e ta wòrdu di dagfar pa presentá den korte. Pa poseshon di arma di kandela si no por paga but, ta detené e persona mesora. 0-Toleransia ta nifiká ku polis lo aktua mesora kontra tur ku falta ku lei.

Un punto hopi importante ta ku polis tin outoridat pa listra tur hende preventivo, den outo, den tas, den kualke pakete ku hende por ta kana kuné. Korda koperá ku polis pasobra keda sin kumpli ku òrdu di polis tambe ta infrakshon. Dos ehèmpel klave:

*Resistí òrdu di polis      but di fl 600.- si pag’e mesora e ta bira fl 510.- anto si laga e kaso bai korte OM ta hasi demanda di Fl 720.-

*Menasa verbal              but di Fl 500.- si pag’e mesora e ta bira fl 425.- anto den korte e demanda di OM lo ta fl 600.-

Jules Ilario miembro di tim di maneho di Kuerpo Polisial a pone énfasis riba stashonamentu di outo robes. Si polis tou bo vehíkulo tur gastu ta pa e doño. Si polis duna un instrukshon mester sigui e òrdu. El a pidi pa mayornan papia ku nan yunan pa un bon komportashon. No ta tolerá insulto na polis. Tur hende mester tin identifikashon i tambe muchanan for di 12 aña.

Minister Hato a bisa ku polis no tei pa stroba karnaval pero no ta permití hendenan ku mal intenshon pa stroba karnaval pa otronan. Mas detaye den edishon di EXTRA.