WILLEMSTAD.-Ministerio Publiko ta informa ku nan a risibi un denunsia di Banko Sentral di Kòrsou i Sint Maarten. For di siman pasa e informashon ta kore rònt ku un mas denunsia a keda entregá relashoná ku dokumentunan falsifiká den negosiashon pa buska operadó pa refineria di Kòrsou.
Ministerio Publiko ta informa ku djaweps dia 26 di yanüari 2023, informashon a kuminsá sirkulá ku Banko Sentral di Kòrsou i Sint Maarten (CBCS) a hasi un denunsia kontra di delitonan penal (inkluso falsifikashon) ku por ta relashoná ku un òf mas di e partidonan involukrá den e negosiashonnan pa haña un ‘operator’ nobo pa e refineria di Kòrsou. Djabièrnè 27 di yanüari 2023, Ministerio Públiko a anunsiá ku ni serka Prokurador General ni serka Fiskal Mayó no tabata tin konosementu di esaki. Ministerio Públiko, presentemente, por konfirmá ku a risibí un denunsia di CBCS. Siman pasá lo a entregá un denunsia na Parkèt di Prokurador General, kual no tabata dirigí na Prokurador General mes sino na un trahadó di e Parkèt. Durante di fin di siman, a notifiká Prokurador General di e denunsia aki. Na e momentu aki, Ministerio Públiko lo no duna mas komentario tokante di e denunsia i/òf kontra di ken esaki ta hasí.
